ബിജു കുര്യന്
പത്തനംതിട്ട: കേരള നിയമസഭാംഗമായി ആദ്യം സത്യപ്രതിജ്ഞ ചെയ്തത് വനിതയാണ്. എന്നാല് ഇതേവരെയുള്ള ചരിത്രത്തില് നിയമസഭയില് അംഗങ്ങളായി എത്താന് കഴിഞ്ഞത് 44 വനിതകള്ക്കു മാത്രം. 14 സഭകളിലായി 87 വനിത അംഗങ്ങള് സത്യപ്രതിജ്ഞ ചെയ്തിട്ടുണ്ട്.
ഇവരില് 29 പേരും വിവിധ സഭകളില് അംഗങ്ങളായിട്ടുള്ളവരാണ്. 15 പേര് ഒരു സഭയില് മാത്രം അംഗവുമായിരുന്നു. 1957ലെ ആദ്യ തെരഞ്ഞെടുപ്പില് ദേവികുളം ദ്വയാംഗ മണ്ഡലത്തിലെ ജനറല് സീറ്റില് നിന്നു തെരഞ്ഞെടുക്കപ്പെട്ട കമ്യൂണിസ്റ്റ് പാര്ട്ടിയിലെ റോസമ്മ പുന്നൂസാണ് ഏപ്രില് 10ന് ആദ്യം സത്യപ്രതിജ്ഞ ചെയ്ത അംഗം.
പ്രോട്ടം സ്പീക്കറായി ആദ്യ കേരള നിയമസഭയില് മറ്റംഗങ്ങള്ക്ക് സത്യപ്രതിജ്ഞ ചൊല്ലിക്കൊടുത്തതും ഈ വനിതയാണ്. ആദ്യ ഉപതെരഞ്ഞെടുപ്പ് വിജയിയും റോസമ്മ പുന്നൂസാണ്. ആദ്യ തെരഞ്ഞെടുപ്പ് കോടതി റദ്ദാക്കിയതോടെ നടന്ന ഉപതെരഞ്ഞെടുപ്പിലും അവര് തന്നെ വിജയിച്ചു.
ഉപതെരഞ്ഞെടുപ്പിലൂടെ 1985ല് സഭാംഗമായ റാന്നിയില് നിന്നുള്ള റേച്ചല് സണ്ണി പനവേലിയാണ് ഏറ്റവും കുറച്ചുകാലം എംഎല്എയായി പ്രവര്ത്തിച്ചിട്ടുള്ള വനിത. 10 തവണ എംഎല്എ ആയിരുന്ന കെ.ആര്. ഗൗരിയമ്മയാണ് ഏറ്റവും കൂടുതല് കാലം നിയമസഭാംഗമായിരുന്ന വനിത.
ദമ്പതികളായി നിയമസഭയില് എത്തിയതും കെ.ആര്. ഗൗരിയമ്മയും ടി.വി. തോമസുമാണ്. കേരള നിയമസഭയുടെ ചരിത്രത്തില് വനിതാ പ്രാതിനിധ്യം തുടക്കം മുതല് കുറവാണ്. മത്സരിക്കുന്ന വനിതാ സ്ഥാനാര്ഥികളുടെ എണ്ണം മൊത്തം സ്ഥാനാര്ഥികളുടെ അംഗബലത്തില് പത്തുശതമാനത്തില് താഴെയാകും. വനിതാ പ്രാതിനിധ്യവും ഇതേവരെ പത്തുശതമാനത്തിനു മുകളിലെത്തിയിട്ടില്ല.
ഏറ്റവും കൂടുതല് വനിതകള് അംഗങ്ങളായത് 1996ലെ പത്താം കേരള നിയമസഭയിലായിരുന്നു. 13 പേര് വിജയിച്ചു. ഏറ്റവും കുറവ് മൂന്ന്, അഞ്ച് നിയമസഭകളിലായിരുന്നു. രണ്ടു സഭകളിലും ഒരാള് വീതമായിരുന്നു ഉണ്ടായിരുന്നത്.
വനിതാ പ്രാതിനിധ്യം ഇങ്ങനെ….
1957 – 6, 1960 – 7,1967 – 1, 1970 – 2, 1977 – 1,1980 – 5,1982 – 5,1987 – 8, 1991 – 8, 1996 – 13, 2001 – 9,2006 – 7, 2011 – 7,2016 – 8.