കൊച്ചി: വിദ്യാര്‍ഥികളുടെ വിവരങ്ങള്‍ ശേഖരിച്ചു വയ്ക്കുന്ന സമ്പൂര്‍ണ പോര്‍ട്ടലില്‍ ഇനി ലോഗിന്‍ ചെയ്യുന്നതിന് പാസ്‌വേര്‍ഡിനു പുറമേ ഒടിപിയും നല്‍കണം. 28 മുതല്‍ ഇത് നടപ്പിലാക്കാന്‍ ഒരുങ്ങുകയാണ് പൊതുവിദ്യാഭ്യാസ വകുപ്പ്. “സമ്പൂര്‍ണ’ പോര്‍ട്ടലിലെ ഡാറ്റ സുരക്ഷതത്വം ഉറപ്പാക്കുന്നതിനായിട്ടാണ് ടു ഫാക്ടര്‍ ഓഥന്‍റിക്കേഷന്‍ (പാസ് വേര്‍ഡ്, ഒടിപി) സംവിധാനം നിലവില്‍ വരുന്നത്.
ഒരു വിദ്യാര്‍ഥിയെ സംബന്ധിക്കുന്ന മുഴുവന്‍ വിവരങ്ങളും സമ്പൂര്‍ണ പോര്‍ട്ടലില്‍ ഉണ്ടാകും. കുട്ടിയുടെ അഡ്മിഷന്‍ എടുക്കുന്നതും വിടുതല്‍ സര്‍ട്ടിഫിക്കറ്റ് നല്‍കുന്നതും സമ്പൂര്‍ണ പോര്‍ട്ടല്‍ വഴിയാണ്.
പ്രഥമാധ്യാപകര്‍, ഉപജില്ലാ വിദ്യാഭ്യാസ ഓഫീസര്‍മാര്‍, ജില്ലാ വിദ്യാഭ്യാസ ഓഫീസര്‍മാര്‍, വിദ്യാഭ്യാസ ഉപ ഡയറക്ടര്‍മാര്‍, സംസ്ഥാനതല ഓഫീസര്‍മാര്‍ തുടങ്ങിയവര്‍ സമ്പൂര്‍ണയില്‍ ലോഗിന്‍ ചെയ്യുമ്പോള്‍ മൊബൈലിലോ ഇ മെയിലിലോ ലഭിക്കുന്ന ഒടിപിയുടെ അടിസ്ഥാനത്തില്‍ മാത്രമേ ഇനി മുതല്‍ ലോഗിന്‍ സാധ്യമാകുകയുള്ളു.
അതുകൊണ്ടുതന്നെ “സമ്പൂര്‍ണ’ യില്‍ ഓഫീസര്‍മാര്‍ അവരവരുടെ മൊബൈല്‍ നമ്പറും ഇ മെയില്‍ വിലാസവും കൃത്യമാക്കേണ്ടതുണ്ടെന്ന് പൊതു വിദ്യാഭ്യാസ ഡയറക്ടറുടെ ഉത്തരവില്‍ പറയുന്നു.
സ്വന്തം ലേഖിക
