രക്ഷിതാവിന്റെ കൈവിട്ട് റോഡിലേക്ക് ഓടിയ പിഞ്ചുബാലന് രക്ഷകനായി ബസ് ഡ്രൈവർ. പാലക്കാട് തൃത്താല കൂറ്റനാട് വാവനൂരിലാണ് സംഭവം. റോഡരികിൽ നിർത്തിയിട്ടിരുന്ന വാഹനങ്ങളുടെ ഇടയിൽ നിന്നും പിഞ്ചു ബാലൻ റോഡ് മുറിച്ച് മറുവശത്തേക്ക് ഓടുകയായിരുന്നു. ഓടിയതാകട്ടെ ഗുരുവായൂരിൽ നിന്നും പട്ടാമ്പി ഭാഗത്തേക്ക് പോവുകയായിരുന്ന ബസിന്റെ മുന്നിലേക്കും.
ഡ്രൈവറുടെ അവസരോചിതമായ ഇടപെടലുകൾ മൂലം സരക്ഷിക്കാനായത് കുഞ്ഞു ജീവനാണ്. സെക്കന്റുകൾ കൊണ്ട് ബസ് സഡൻ ബ്രേക്കിട്ട് നിർത്തിയതിനാൽ കുഞ്ഞ് അദ്ഭുതകരമായി രക്ഷപ്പെടുകയായിരുന്നു. ‘മയിൽവാഹനം’ എന്ന ബസിന്റെ ഡ്രൈവർ അനൂപിന്റെ മനസാന്നിധ്യം കൊണ്ടാണ് കുട്ടിയെ രക്ഷിക്കാനായത്.
