നെടുങ്കണ്ടം: കിടപ്പുരോഗിയായ വയോധികയുടെ മാല മോഷ്ടിച്ച പ്രതി അറസ്റ്റിൽ. കട്ടപ്പന സ്വദേശി മറ്റത്തിൽ പ്രദീപ് നാരായണൻ (44) ആണ് നെടുങ്കണ്ടം പോലീസിന്റെ പിടിയിലായത്.
മുണ്ടിയെരുമ പുത്തൻപറമ്പിൽപ്പടിക്കു സമീപം പട്ടരുമഠത്തിൽ സരള (65)യുടെ മാലയാണ് കഴിഞ്ഞ ദിവസം മോഷണം പോയത്. പകൽ സമയം പ്രദേശത്തെ പല വീടുകളിലും കയറിയിറങ്ങിയ മോഷ്ടാവ് കിടപ്പുരോഗികളുള്ള വീട് കൃത്യമായി ചോദിച്ചറിഞ്ഞിരുന്നു.
വൈകുന്നേരം ഇയാൾ സരളയുടെ വീട്ടിലെത്തി. ഫിസിയോതെറാപ്പിസ്റ്റ് എന്ന് പരിചയപ്പെടുത്തുകയും ചികിത്സിക്കുന്നതിനിടെ മാല കൈക്കലാക്കുകയുമായിരുന്നു. പ്രദേശത്തെ നിരീക്ഷണ കാമറകൾ കേന്ദ്രീകരിച്ച് നടത്തിയ അന്വേഷണത്തിൽ ലഭിച്ച വിവരങ്ങളിൽനിന്നാണ് പ്രതിയെ പിടികൂടിയത്.
സംസ്ഥാനത്തെ വിവിധ സ്റ്റേഷനുകളിലായി ഇയാൾ നിരവധി മോഷണക്കേസുകളിൽ പ്രതിയാണെന്ന് പോലീസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
