ആലപ്പുഴ: കായംകുളത്ത് നവകേരള സദസ് നടക്കുന്ന വേദിക്ക് സമീപമുള്ള ഇറച്ചിക്കടകള്‍ മൂടിയിടാന്‍ നിർദേശവുമായി നഗരസഭാ ആരോഗ്യവിഭാഗം. വേദിയുടെ 50 മീറ്റര്‍ അകലെയാണ് ഇറച്ചി മാര്‍ക്കറ്റ്.
സദസ് നടക്കുന്ന സാഹചര്യത്തില്‍ മാര്‍ക്കറ്റിലെ കടകള്‍ മൂടിയിടാനാണ് വ്യാപാരികള്‍ക്ക് നിര്‍ദേശം നല്‍കിയിരിക്കുന്നത്.
പരിപാടിക്കെത്തുന്ന ജനങ്ങള്‍ക്ക് പ്രയാസമുണ്ടാക്കുന്നതുകൊണ്ടാണ് കടകള്‍ മൂടിയിടാന്‍ നിര്‍ദേശം നല്‍കിയതെന്നാണ് വിശദീകരണം.
സംഭവത്തില്‍ കടുത്ത പ്രതിഷേധവുമായി ഇറച്ചി വ്യാപാരികള്‍ രംഗത്തെത്തി. കടകള്‍ മൂടിയിട്ടാല്‍ കച്ചവടം എങ്ങനെ നടക്കുമെന്നാണ് വ്യാപാരികള്‍ ഉന്നയിക്കുന്ന ചോദ്യം. കച്ചവടം മുടങ്ങുന്നതിനാല്‍ നിര്‍ദേശം പിന്‍വലിക്കണമെന്നും ഇവര്‍ ആവശ്യപ്പെട്ടു.
കായംകുളത്തെ നവകേരള സദസ് നടക്കുന്ന വേദിക്ക് സമീപത്തെ ഹോട്ടലുകളിലും നിയന്ത്രണം ഏര്‍പ്പെടുത്തിയിട്ടുണ്ട്. ഇവിടെ പാചകവാതകം ഉപയോഗിക്കാന്‍ പാടില്ലെന്നാണ് നിര്‍ദേശം.
