ധരംശാല: മലപ്പുറത്ത് ജനിച്ച ദേവ്ദത്ത് പടിക്കൽ ഇന്ത്യൻ ടെസ്റ്റ് ടീമിൽ അരങ്ങേറി. ധരംശാല ടെസ്റ്റിലാണ് ദേവ്ദത്തിന് അവസരം ലഭിച്ചത്. ഫോം കണ്ടെത്താൻ വിഷമിച്ച രജത് പാട്ടിദാറിനെ പുറത്തിരുത്തി പകരം ദേവ്ദത്ത് പടിക്കലിനെ ഇന്ത്യ പ്ലേയിംഗ് ഇലവനിൽ ഉൾപ്പെടുത്തുകയായിരുന്നു.
2024 രഞ്ജി ട്രോഫി സീസണിൽ കർണാടകയ്ക്കുവേണ്ടി ആറ് ഇന്നിംഗ്സിൽ 556 റണ്‍സ് നേടിയ മികവാണ് പടിക്കലിനെ ടെസ്റ്റ് ടീമിൽ എത്തിച്ചത്.
ഇംഗ്ലണ്ടിനെതിരായ അഞ്ച് മത്സര ടെസ്റ്റ് പരന്പരയിൽ അരങ്ങേറ്റം നടത്തുന്ന നാലാമത് ബാറ്ററാണ് ദേവ്ദത്ത് പടിക്കൽ. പാട്ടിദാർ, സർഫറാസ് ഖാൻ, വിക്കറ്റ് കീപ്പർ ബാറ്ററായ ധ്രുവ് ജുറെൽ എന്നിവർക്ക് നേരത്തേ അവസരം ലഭിച്ചിരുന്നു. ഇതിനു പുറമേ ബൗളർ ആകാഷ് ദീപും അരങ്ങേറ്റം നടത്തി.
