കുലശേഖരം: കന്യാകുമാരി കോതയാറിനു സമീപത്തെ തോട്ടത്തിൽ കുടുംബത്തോടൊപ്പം ഭക്ഷണം കഴിക്കാനിരുന്ന 13 വയസുകാരൻ മരത്തിന്‍റെ ശിഖരം മുറിഞ്ഞു വീണു മരിച്ചു.
മുംബൈയിൽ താമസിക്കുന്ന നാഗർകോവിൽ കീഴപെരുവിള സ്വദേശി ഗാഡ്‌സൻ സാമുവലിന്‍റെ മകൻ മിത്രനാണു മരിച്ചത്. കഴിഞ്ഞ ദിവസമാണു ഭാര്യയും രണ്ടു മക്കളുമൊന്നിച്ചു ഗാഡ്‌സൻ കോതയാറിലെത്തിയത്.
ഇവരോടൊപ്പം മറ്റ് അഞ്ചു കുടുംബങ്ങളും ഉണ്ടായിരുന്നു. എട്ടു കുട്ടികളുൾപ്പെടെ 20 പേരടങ്ങുന്ന സംഘം മൂന്നു കാറുകളിലും രണ്ടു ബൈക്കുകളിലുമായാണ് കോതയാറിലെത്തിയത്.
ശിഖരം മുറിഞ്ഞു വീഴുന്നതു കണ്ടു എല്ലാവരും എഴുന്നേറ്റ് ഓടിയെങ്കിലും മിത്രനും മറ്റൊരു കുട്ടിയും ശിഖരങ്ങൾക്കിടയിൽപ്പെടുകയായിരുന്നു. ഗുരുതര പരിക്കേറ്റ ഇരുവരെയും കുലശേഖരത്തുള്ള സ്വകാര്യ ആശുപതിയിൽ എത്തിച്ചെങ്കിലും മിത്രൻ മരിച്ചു.
