കൊച്ചി: എറണാകുളത്ത് പോലീസുകാരെ ആക്രമിച്ച അഞ്ചു യുവാക്കള് അറസ്റ്റില്. മരോട്ടിച്ചുവടില് ലഹരി ഉപയോഗിച്ച് പ്രശ്നമുണ്ടാക്കിയ യുവാക്കളെ കസ്റ്റഡിയിലെടുക്കാന് എത്തിയപ്പോഴാണ് സംഭവം. യുവാക്കളുടെ ആക്രമണത്തില് തൃക്കാക്കര സിഐയുടെ കൈയ്ക്ക് പരിക്കേറ്റു.
വയനാട് സ്വദേശി അക്ഷയ്, കൊല്ലം സ്വദേശി ജിനീഷ്, നെന്മാറ സ്വദേശിയായ ഷംസുദ്ദീന്, തിരുവനന്തപുരം സ്വദേശികളായ അജ്മല്, അല്ത്താഫ് എന്നിവരാണ് കസ്റ്റഡിയില് ഉള്ളത്. പോലീസിനെ ആക്രമിച്ചതിനും ഔദ്യോഗിക കൃത്യനിര്വഹണം തടസപ്പെടുത്തിയത് അടക്കമുള്ള വകുപ്പുകള് ചേര്ത്താണ് കേസ് എടുത്തിരിക്കുന്നത്.
മദ്യലഹരിയില് യുവാക്കള് പ്രശ്നമുണ്ടാക്കുന്നുവെന്ന് അറിഞ്ഞ് നൈറ്റ് പട്രോളിംഗ് ഡ്യൂട്ടിയിലുണ്ടായിരുന്ന പോലീസുകാരാണ് മരോട്ടിച്ചുവടില് എത്തിയത്. മദ്യപിച്ച യുവാക്കള് പോലീസുകാരെ അസഭ്യം പറയുകയും കസ്റ്റഡിയില് എടുക്കുന്നതിനിടെ ആക്രമിക്കുകയുമായിരുന്നു.
ബലം പ്രയോഗിച്ചാണ് യുവാക്കളെ ജീപ്പിലേക്ക് കയറ്റിയത്. ഇതിനിടെയാണ് സിഐയുടെ കൈയ്ക്ക് പൊട്ടലേറ്റത്. യുവാക്കള് കളമശേരി മെഡിക്കല് കോളേജ് ആശുപത്രിയില് ചികിത്സയിലാണ്. കൊച്ചിയിലെ ഒരു മാളിലെ ജീവനക്കാരാണ് യുവാക്കള്.
