ഹനോയ്: വിയറ്റ്നാമിലെ പ്രശസ്തമായ ഹനോയ് ട്രെയിൻ സ്ട്രീറ്റിൽ ഇന്ത്യൻ വിനോദസഞ്ചാരികൾ നൃത്തം ചെയ്യുന്ന വീഡിയോ സമൂഹമാധ്യമങ്ങളിൽ വൈറലായിരിക്കുന്നത്. വലിയ തരത്തിലുള്ള വിമർശനങ്ങളും ഈ വീഡിയോ നേരിടുന്നുണ്ട്. വിദേശരാജ്യങ്ങളിൽ പോയി ഇത്തരത്തിൽ പെരുമാറുന്നത് ഇന്ത്യൻ സഞ്ചാരികളെക്കുറിച്ചുള്ള മോശം മുൻവിധികൾ കൂടുതൽ ശക്തമാക്കാൻ പ്രേരിപ്പിക്കും എന്നതാണ് ഉയരുന്ന പ്രധാന ആക്ഷേപം.
മുംബൈ ആസ്ഥാനമായുള്ള ഒരു ജ്വല്ലറി ബ്രാൻഡ് ഉടമയും കൂട്ടുകാരുമാണ് ട്രെയിൻ സ്ട്രീറ്റിലെ റെയിൽവേ ട്രാക്കിൽ നിന്ന് ഷാരൂഖ് ഖാന്റെ പ്രശസ്തമായ ‘ഛയ്യ ഛയ്യ’ എന്ന ഗാനത്തിന് ചുവടുവെച്ചത്. ‘വിയറ്റ്നാമിലെ ട്രെയിൻ സ്ട്രീറ്റിൽ പോയിട്ട് ‘ഛയ്യ ഛയ്യ’ ചെയ്തില്ലെങ്കിൽ പിന്നെ എന്ത് ട്രെയിൻ സ്ട്രീറ്റ് യാത്ര” എന്ന അടിക്കുറിപ്പോടെയാണ് ഇവർ വീഡിയോ പങ്കുവെച്ചത്. കഫേകളും വീടുകളും നിറഞ്ഞ ഇടുങ്ങിയ ഈ റെയിൽവേ ട്രാക്ക് വിയറ്റ്നാമിലെ പ്രധാന ടൂറിസ്റ്റ് കേന്ദ്രങ്ങളിൽ ഒന്നാണ്.
വീഡിയോ അതിവേഗം സമൂഹ മാധ്യമങ്ങളിൽ തരംഗമാകുകയായിരുന്നു, അതൊടൊപ്പം വ്യാപക വിമര്ശനത്തിനിടയാക്കുകയും ചെയ്തു. വിദേശത്ത് പോകുന്ന ഇന്ത്യൻ ടൂറിസ്റ്റുകൾ പൊതുസ്ഥലങ്ങളിൽ ബഹളമുണ്ടാക്കുന്നവരും റീലുകൾക്കും സോഷ്യൽ മീഡിയ ശ്രദ്ധയ്ക്കും വേണ്ടി എന്തും ചെയ്യുന്നവരുമാണെന്ന ഒരു മോശം പ്രതിച്ഛായ ഇതിനോടകം തന്നെയുണ്ട്. ഇത്തരം പ്രവർത്തികൾ ആ മുൻവിധി ശരിവെയ്ക്കുന്നതാണെന്നാണ് ഭൂരിഭാഗം പേരുടെയും വാദം.
ചുറ്റുമുള്ള വിദേശ വിനോദസഞ്ചാരികൾ ശാന്തമായി അവിടുത്തെ അന്തരീക്ഷം ആസ്വദിക്കുമ്പോൾ, ഇന്ത്യൻ സഞ്ചാരികൾ മാത്രം പൊതുസ്ഥലങ്ങളെ ഒരു ബോളിവുഡ് സെറ്റാക്കി മാറ്റാൻ ശ്രമിക്കുന്നത് അരോചകമാണെന്ന് പലരും എക്സിൽ കുറിച്ചു. ഈ സംഭവത്തിന് തൊട്ടുമുൻപ് വിയറ്റ്നാമിലെ ഒരു വിമാനത്താവളത്തിൽ വെച്ച് മറ്റൊരു കൂട്ടം ഇന്ത്യൻ ടൂറിസ്റ്റുകൾ റൺവേയ്ക്ക് സമീപം ഗർബ നൃത്തം ചെയ്തതും വിവാദമായിരുന്നു.
