അമ്മയുടെ പിറന്നാളിന് വ്യത്യസ്തവും സാങ്കേതികവിദ്യ സമന്വയിപ്പിച്ചതുമായ സമ്മാനം നൽകി ശ്രദ്ധ നേടുകയാണ് ഹൈദരാബാദിൽ നിന്നുള്ള പത്താം ക്ലാസ് വിദ്യാർഥിയായ ഭുവനേഷ്. റോബോട്ടിക്സ് ഇൻസ്ട്രക്ടർ എന്ന് സ്വയം വിശേഷിപ്പിക്കുന്ന ഈ കൊച്ചു മിടുക്കൻ, തന്‍റെ അമ്മയ്ക്ക് ജന്മദിന കാർഡ് കൈമാറുന്നതിനായി ഒരു ചെറിയ റോപ്‌വേ സംവിധാനം തന്നെയാണ് നിർമിച്ചത്.
തന്‍റെ ഇൻസ്റ്റാഗ്രാം അക്കൗണ്ടിലൂടെയാണ് ഭുവനേഷ് ഈ അപൂർവ്വ ജന്മദിന സമ്മാനത്തിന്‍റെ വീഡിയോ പങ്കുവെച്ചത്. അർഡുയിനോ യുനോ, ഇൻഫ്രാറെഡ് സെൻസർ, റേഡിയോ ഫ്രീക്വൻസി (RF) വയർലെസ് മോഡ്യൂൾ എന്നിവ ഉപയോഗിച്ചാണ് ഈ റോബോട്ടിക് സംവിധാനം തയ്യാറാക്കിയിരിക്കുന്നത്.
സെൻസറിന് മുന്നിലേക്ക് ആരെങ്കിലും വരുമ്പോൾ ഐആർ സെൻസർ അത് തിരിച്ചറിയുകയും, ആർ.എഫ് മോഡ്യൂൾ വഴി സ്വീകർത്താവിന്‍റെ ഭാഗത്തേക്ക് സന്ദേശം അയക്കുകയും ചെയ്യും. തുടര്‍ന്ന്, റോപ്‌വേയിൽ ഘടിപ്പിച്ചിട്ടുള്ള ‘ആവിഷ്‌കാർ’ റോബോട്ട് സജീവമാവുകയും കാർഡുമായി റോപ്പിലൂടെ മുന്നോട്ട് നീങ്ങുകയും ചെയ്യുന്നതാണ് ഇതിന്റെ രീതി.
തന്‍റെ കൈ സെൻസറിന് മുന്നിൽ കാണിച്ചുകൊണ്ട് ഈ സംവിധാനം എങ്ങനെയാണ് പ്രവർത്തിക്കുന്നതെന്ന് ഭുവനേഷ് വീഡിയോയിലൂടെ കാണിച്ചു തരുന്നുമുണ്ട്. “റോപ്‌വേ സംവിധാനത്തോടെ അമ്മയ്ക്കൊരു ജന്മദിന കാർഡ്” എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
കൗമാരക്കാരന്‍റെ ഈ സർഗാത്മകതയ്ക്കും സാങ്കേതിക മികവിനും സമൂഹമാധ്യമങ്ങളിൽ വൻ പ്രശംസയാണ് ലഭിക്കുന്നത്. കൂടുതൽ ചെറുപ്പക്കാർ ശാസ്ത്ര-സാങ്കേതിക രംഗത്തേക്ക് വരണമെന്നും ഭാവിയിൽ വലിയ കണ്ടുപിടുത്തങ്ങൾ നടത്താൻ ഭുവനേഷിന് സാധിക്കട്ടെയെന്നും ആളുകൾ ആശംസിച്ചു.
