വാഷിംഗ്ടൺ ഡിസി: ബഹിരാകാശത്തു മാത്രം ദൃശ്യമാകുന്ന സൂര്യഗ്രഹണത്തിന്‍റെ ചിത്രങ്ങൾ ജ്യോതിശാസ്ത്രജ്ഞന്മാർക്ക് വിസ്മയമായി! യുഎസ് ബഹിരാകാശ ഏജൻസിയായ നാസയുടെ സോളാർ ഡൈനാമിക്സ് ഒബ്സർവേറ്ററി ആണ് ഏപ്രിൽ 27ന് നടന്ന സൂര്യഗ്രഹണത്തിന്‍റെ അപൂർവദൃശ്യങ്ങൾ ഒപ്പിയെടുത്തത്. സൂര്യന്‍റെ 23 ശതമാനവും മറഞ്ഞ ഈ സൂര്യഗ്രഹണം ഭൂമിയിൽനിന്നു കാണാൻ കഴിയുമായിരുന്നില്ല.
സൂര്യനെ നിരീക്ഷിക്കാൻ 2010 ഫെബ്രുവരിയിലാണു സോളാർ ഡൈനാമിക്സ് ഒബ്സർവേറ്ററി നാസ വിക്ഷേപിച്ചത്. തുടർച്ചയായി സൂര്യനെ ഇതു നിരീക്ഷിച്ചു വരുന്നു. സൂര്യ ഗ്രഹണങ്ങൾ ഇടയ്ക്കിടെ സംഭവിക്കുന്നുണ്ടെങ്കിലും അവയിൽ പലതും ഭൂമിയിൽനിന്നു ദൃശ്യമല്ല.
മേയ് 25ന് സൂര്യന്‍റെ നാലു ശതമാനം മാത്രം മൂടുന്ന ഗ്രഹണവും ജൂലൈ 25ന് സൂര്യന്‍റെ 62 ശതമാനം മൂടുന്ന മറ്റൊരു ഗ്രഹണവും സംഭവിക്കുമെന്നു നാസ അറിയിച്ചു. ഇവയും ഭൂമിയിൽനിന്നു കാണാനാവില്ല.
ഭൂമിയിൽനിന്നു ദൃശ്യമാകുന്ന അടുത്ത സൂര്യഗ്രഹണം സെപ്റ്റംബർ 21നാണ്. ന്യൂസിലാൻഡ്, ദക്ഷിണ പസഫിക്, അന്‍റാർട്ടിക്ക എന്നിവിടങ്ങളിൽ ഗ്രഹണം ദൃശ്യമാകും. 2026 ഓഗസ്റ്റ് 12ന് പൂർണ സൂര്യഗ്രഹണം സംഭവിക്കും. കിഴക്കൻ ഗ്രീൻലാൻഡ്, പടിഞ്ഞാറൻ ഐസ്‌ലാൻഡ്, വടക്കൻ സ്‌പെയിൻ എന്നിവിടങ്ങളിൽ ദൃശ്യമാകും.
പൂർണ സൂര്യഗ്രഹണം രണ്ടു മിനിറ്റിലേറെ ദൈർഘ്യമേറിയതായിരിക്കും. ഭൂമിയിൽനിന്നു ദൃശ്യമായ അവസാന സൂര്യഗ്രഹണം മാർച്ചിലായിരുന്നു.
