വാഷിംഗ്ടൺ: കനത്ത മഞ്ഞുവീഴ്ചയെത്തുടർന്ന് യുഎസിൽ വ്യോമഗതാഗതം പ്രതിസന്ധിയിൽ. ഇന്നലെ വൈകുന്നേരം നാലു വരെ 1500ലധികം വിമാന സർവീസുകളാണ് വിവിധ വിമാനക്കമ്പനികൾ രാജ്യത്താകമാനം റദ്ദാക്കിയത്.
രാജ്യത്തിന്റെ വടക്കുകിഴക്കൻ ഭാഗങ്ങളിലും മധ്യ-പടിഞ്ഞാറൻ മേഖലകളിലും ശൈത്യകാല കൊടുങ്കാറ്റും ശക്തമായ മഞ്ഞുവീഴ്ചയും തുടരുമെന്നാണ് കാലാവസ്ഥാ നിരീക്ഷണ കേന്ദ്രം ഇന്നും മുന്നറിയിപ്പ് നൽകിയിരിക്കുന്നത്. ഇന്നലെ വൈകുന്നേരം വരെ 1581 വിമാനങ്ങളാണ് റദ്ദാക്കിയത്. 6883 വിമാനങ്ങൾ വൈകുകയും ചെയ്തു.
ന്യൂയോർക്ക്, ചിക്കാഗോ വിമാനത്താവളങ്ങളിലാണ് വലിയ പ്രതിസന്ധി നിലനിൽക്കുന്നത്. റദ്ദാക്കിയ 785 വിമാനങ്ങളും ന്യൂയോർക്ക് വിമാനത്താവളത്തിലേക്ക് പോയതും ഇവിടെനിന്ന് പുറപ്പെട്ടതുമാണ്. ക്രിസ്മസ് യാത്രക്കാരുടെ തിരക്കേറിയ സമയത്താണ് സർവീസ് മുടങ്ങുന്നത്.
ഇതോടെ ആയിരക്കണക്കിന് യാത്രക്കാർ പ്രതിസന്ധിയിലായി. ന്യൂയോർക്ക് നഗരത്തിലടക്കം വലിയ മഞ്ഞുവീഴ്ച പ്രതീക്ഷിക്കുന്നുണ്ട്. മഞ്ഞുവീഴ്ച റോഡ് ഗതാഗതത്തെയും സാരമായി ബാധിക്കുമെന്നാണു മുന്നറിയിപ്പ്.
