കൊച്ചി: കൊച്ചി നഗരത്തില് മരണപ്പാച്ചില് നടത്തുന്ന ന്യൂ ജനറേഷന് ബൈക്ക് ഉള്പ്പെടെയുള്ള വാഹനങ്ങളുടെ നിയമ ലംഘനങ്ങള് കര്ശനമായി തടയുന്നതിന് ജില്ലാ കളക്ടര് ബന്ധപ്പെട്ട ഉദ്യോഗസ്ഥരുടെ സംയുക്ത യോഗം അടിയന്തരമായി വിളിക്കണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റീസ് അലക്സാണ്ടര് തോമസ് ഉത്തരവിട്ടു.
ഹെല്മറ്റില്ലാതെ, രൂപമാറ്റം വരുത്തിയ ബൈക്കുകളില് മൂന്നുപേരെ വരെ കയറ്റി നടപ്പാതയിലൂടെ യാത്ര ചെയ്യുന്നവരെ കുറിച്ചുള്ള പത്രവാര്ത്തയുടെ അടിസ്ഥാനത്തില് സ്വമേധയാ രജിസ്റ്റര് ചെയ്ത കേസിലാണ് ഉത്തരവ്. എ.ഐ കാമറകള് സ്ഥാപിക്കണമെന്ന ആവശ്യവും ശക്തമാണ്. ജില്ലാ കളക്ടര് വിളിക്കുന്ന സംയുക്ത ഉദ്യോഗസ്ഥതല യോഗത്തില് റോഡ് സുരക്ഷാ കമ്മീഷണര്, ജില്ലാ പോലീസ് മേധാവി (സിറ്റി), ട്രാഫിക് അസി.കമ്മീഷണര്, ആര്ടിഒ , ജോയിന്റ് ആര്ടിഒ, കൊച്ചി കോര്പറേഷന് സെക്രട്ടറി എന്നിവര് പങ്കെടുത്ത് പരിഹാര മാര്ഗങ്ങള് പരിശോധിക്കണം.
എത്ര എഐ കാമറകള് നഗരത്തിലുണ്ടെന്നും പ്രവര്ത്തിക്കുന്നുണ്ടെന്നും വിലയിരുത്തണം. കൂടുതല് കാമറകള് ആവശ്യമുണ്ടോ എന്ന് പരിശോധിക്കണം. ഇത് ആരാണ് സ്ഥാപിക്കേണ്ടതെന്നും തീരുമാനിക്കണം. യോഗത്തിന്റെ അടിസ്ഥാനത്തില് ജില്ലാ കളക്ടര്, ജില്ലാ പോലീസ് മേധാവി, ആര്ടിഒ, റോഡ് സുരക്ഷാ കമ്മീഷണര്, കോര്പറേഷന് സെക്രട്ടറി എന്നിവര് മൂന്നാഴ്ചക്കകം കമ്മീഷനില് റിപ്പോര്ട്ട് സമര്പ്പിക്കണം.
ആര്ടിഒ, ട്രാഫിക് അസി.കമ്മീഷണര്, ജോയിന്റ് ആര്ടിഒ, റോഡ് സുരക്ഷാ കമ്മീഷണറുടെയും നഗരസഭാ സെക്രട്ടറിയുടെയും പ്രതിനിധി എന്നിവര് ജനുവരി 22 ന് രാവിലെ 10 ന് പത്തടി പാലം റസ്റ്റ് ഹൗസില് നടക്കുന്ന സിറ്റിംഗില് നേരിട്ട് ഹാജരാകണമെന്ന് ജസ്റ്റിസ് അലക്സാണ്ടര് തോമസ് നിര്ദ്ദേശിച്ചു.
