കൊച്ചി : തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിനായി രാഷ്ട്രീയപാർട്ടികൾക്ക് ചിഹ്നം അനുവദിച്ച് സംസ്ഥാന തെരഞ്ഞെടുപ്പ് കമ്മീഷൻ വിജ്ഞാപനം പുറപ്പെടുവിച്ചു.
സ്ഥാനാർഥികൾക്ക് ചിഹ്നം ശിപാർശ ചെയ്യുന്നതിന് ചുമതലപ്പെടുത്തിയിട്ടുള്ള പാർട്ടി ഭാരവാഹികളുടെ ഒപ്പ് അതത് രാഷ്ട്രീയ പാർട്ടികളുടെ സംസ്ഥാന ഭാരവാഹികൾ സാക്ഷ്യപ്പെടുത്തി ജില്ലാ തെരഞ്ഞെടുപ്പ് ഉദ്യോഗസ്ഥന് സമർപ്പിക്കണം.
പകർപ്പ് സംസ്ഥാന തെരഞ്ഞെടുപ്പ് കമ്മീഷന് അയയ്ക്കുകയും വേണം. ചിഹ്നം ശിപാർശ ചെയ്യുന്നതിന് അധികാരപ്പെടുത്തിയിട്ടുള്ള പാർട്ടി ഭാരവാഹികൾ, സ്വന്തം കൈപ്പടയിൽ ഒപ്പ് വച്ച ശിപാർശ കത്ത് ബന്ധപ്പെട്ട വരണാധികാരി ചിഹ്നം അനുവദിക്കുന്ന 24 ന് വൈകിട്ട് മൂന്നിന് മുൻപ് സമർപ്പിക്കണം.
ഓൺലൈനായും തുക കെട്ടിവയ്ക്കാം
കൊച്ചി: തദ്ദേശ തെരഞ്ഞെടുപ്പിൽ സ്ഥാനാർഥികൾക്ക് നിക്ഷേപത്തുക ഓൺലൈനായി അടക്കാം. ഇ-ട്രഷറി മുഖേന തുക കെട്ടിവെക്കാനുള്ള അവസരമാണ് തെരഞ്ഞെടുപ്പ് കമ്മീഷൻ ഒരുക്കിയിട്ടുള്ളത്.ട്രഷറിയുടെ വെബ് സൈറ്റായ www.etreasury.kerala.gov.in വഴി നെറ്റ് ബാങ്കിംഗ്, കാർഡ് പേയ്മെന്റ്, യുപിഐ, ക്യു.ആർ കോഡ് തുടങ്ങിയ മാർഗങ്ങൾ ഉപയോഗിച്ച് പണമടയ്ക്കാനാകും. ഇതിന് പുറമേ etr5.etreasury.
kerala.gov.in എന്ന വെബ്സൈറ്റ് മുഖേനയും അടയ്ക്കാനാകും. കൂടാതെ ട്രഷറിയിൽ നേരിട്ടും വരണാധികാരി മുൻപാകെയും പണം അടക്കുന്നതിനുള്ള അവസരവുമുണ്ട്.
ഗ്രാമ പഞ്ചായത്തിൽ 2,000 രൂപ രൂപയും ബ്ലോക്ക് പഞ്ചായത്തിൽ 4,000 രൂപയും ജില്ലാ പഞ്ചായത്തിൽ 5,000 രൂപയുമാണ് സ്ഥാനാർഥി കെട്ടിവയ്ക്കേണ്ടത്.നഗരസഭകളിലും കോർപ്പറേഷനിലും യഥാക്രമം 4,000, 5,000 രൂപ വീതവുമാണ് കെട്ടിവെക്കേണ്ടത്. പട്ടിക ജാതി, പട്ടിക വർഗം വിഭാഗത്തിൽപ്പെട്ടവർ ഇതിൻ്റെ 50 ശതമാനം തുക കെട്ടിവച്ചാൽമതി.
