കാബിൻ ക്രൂ ജീവിതം തനിക്കു നല്കിയ മനോഹരമായ നിമിഷങ്ങളെക്കുറിച്ച് വാചാലയായി നിതിക, കാ ബിൻ ക്രൂ ജീവിതത്തിൽനിന്ന് ഔദ്യോഗികമായി രാജിവച്ചതിനെക്കുറിച്ച് മനസ് തുറക്കുന്ന ഹൃദയസ്പർശിയായ കുറിപ്പ് വൈറലാകുന്നു.
പലരും കൗതുകത്തോടെയും ആരാധനയോടെയും നോക്കിക്കാണുന്ന ക്യാബിൻ ക്രൂ ജോലിയിൽ നിന്നുള്ള വിടവാങ്ങൽ നിമിഷങ്ങൾ പങ്കുവെച്ചിരിക്കുകയാണ് നിതിക മേത്ത. അഞ്ചു വർഷത്തെ സേവനത്തിന് ശേഷമാണ് താൻ ഈ ജോലി ഉപേക്ഷിക്കുന്നതെന്ന് ഇൻസ്റ്റാഗ്രാമിൽ പങ്കുവെച്ച വീഡിയോയിൽ നിതിക വ്യക്തമാക്കുന്നു.
ഇനി മുതൽ അതിരാവിലെയുള്ള വിമാനയാത്രകൾക്കായി തയാറെടുക്കേണ്ടി വരില്ല. ഹോങ്കോംഗിലെ തെരുവുകളിലൂടെ സൂര്യോദയ സമയത്ത് തനിച്ച് നടന്ന നിമിഷങ്ങളും, ആദ്യമായി വിമാനത്തിൽ കയറുന്ന യാത്രക്കാരുടെ ഭയം മാറ്റിക്കൊടുക്കുന്നതും താൻ ഒത്തിരി മിസ് ചെയ്യും. ആയിരക്കണക്കിന് പെൺകുട്ടികൾ സ്വപ്നം കാണുന്ന ഒരു ജീവിതരീതിയാണ് താൻ ഉപേക്ഷിക്കുന്നതെന്നും നിതിക വ്യക്തമാക്കി.
മത്സരപരീക്ഷകളുടെ സമ്മർദ്ദത്തിൽ നിന്ന് രക്ഷപെടാനാണ് ഈ ജോലി തെരഞ്ഞെടുത്തതെന്ന് നിതിക വെളിപ്പെടുത്തി. പുതിയൊരു വഴി തേടി നടന്ന സമയത്താണ് ഈ കരിയർ മുന്നിൽ വന്നത്. ഒരിക്കലും ചിന്തിക്കാത്ത തരത്തിലുള്ള ജീവിതമാണ് ഇത് നൽകിയത്. അയ്യായിരത്തിലധികം വിമാനയാത്രകളും അഞ്ചു വർഷത്തെ അനുഭവങ്ങളും തന്നെ മാറ്റിമറിച്ചുവെന്നും നിതിക വീഡിയോയിൽ പങ്കുവയ്ക്കുന്നുണ്ട്.
കഴിഞ്ഞ ആറു മാസമായി ഈ വീഡിയോ പങ്കുവയ്ക്കാൻ താൻ മടിച്ചിരുന്നുവെന്നും, ചില അനുഭവങ്ങൾ വാക്കുകളിലൂടെ പ്രകടിപ്പിക്കാൻ സമയമെടുക്കുമെന്നും നിതിക പറഞ്ഞു. നിതികയുടെ ഇൻസ്റ്റഗ്രാം അക്കൗണ്ടിൽ പങ്കുവച്ച വീഡിയോ ഇതിനകം തന്നെ ആളുകളൾ ഏറ്റെടുത്തു. നിതികയോടുള്ള സ്നേഹവും ആശ്വാസവാക്കുകളും സമാന ജീവിതാനുഭവങ്ങളുമാണ് കമന്റ് ബോക്സിൽ നിറഞ്ഞത്.
