ഓറല് അള്സറുകള് എന്നത് വായുടെ ഉള്ഭാഗത്ത് കാണപ്പെടുന്ന ചെറിയതും വേദനയുണ്ടാക്കുന്നതുമായ ഗോളാകൃതിയിലുള്ള പാടുകളാണ്. ഇവയുടെ മദ്ധ്യഭാഗം വെള്ള, മഞ്ഞ, ഇളം ചാരം എന്നിവയില് ഏതെങ്കിലും നിറമോ ചുറ്റും ചുവപ്പു നിറവും ആയിരിക്കും. സാധാരണയായി കവിളിന്റെ ഉള്ഭാഗം (ബക്കല് മ്യൂക്കോസ), നാവ്, ചുണ്ട്, വായുടെ മുകള്ഭാഗം എന്നിവിടങ്ങളിലാണ് ഇവ കാണപ്പെടുന്നത്. ഇത് മറ്റു ബുദ്ധിമുട്ടുകള് ഒന്നും ഉണ്ടാക്കാതെ തന്നെ 1 – 2 ആഴ്ചയ്ക്കുള്ളില് സുഖം പ്രാപിക്കും.
വായ്ക്കുള്ളിലെ എപ്പിതീലിയത്തിനും അതിനു താഴെയുള്ള പാളിയായ ലാമിന പ്രോപ്രിയയ്ക്കും ഉണ്ടാകുന്ന കേടുപാടുകള് മൂലമാണ് ഓറല് അള്സറുകള് ഉണ്ടാകുന്നത്. മാനസികാഘാതം, ഉത്കണ്ഠ, റേഡിയേഷന് ചികിത്സ, രോഗാണുബാധ, ചില മരുന്നുകളുടെ ഉപയോഗം, ഇന്ഫ്ളമേറ്ററി സിസ്റ്റമിക് ഡിസോര്ഡര് എന്നിവയാണ് കേടുപാടുകള്ക്കു കാരണമാകുന്നത്.
തടയാന് കഴിയുന്ന കാരണങ്ങള്
· കവിളിന്റെ ഉള്ഭാഗം ഇടയ്ക്കിടെ കടിക്കുന്നത് ഒഴിവാക്കുക.
· മൂര്ച്ചയുള്ള പല്ലുകള്, ബ്രേസസ്, തെറ്റായ രീതിയില് ഫില്ലിംഗുകള് ചെയ്യുന്നത്, ശരിയായിരിക്കാത്ത കൃത്രിമ പല്ലുകള്.
· ഫുഡ് അലര്ജി / എരിവോ ചൂടോ കൂടുതലുള്ള ഭക്ഷണം
· ഭക്ഷണമോ പാനീയമോ കഴിക്കുമ്പോള് ഉണ്ടാകുന്ന മുറിവുകള്
· മാനസിക സമ്മര്ദവും ഉത്കണ്ഠയും
· പല്ല് തേയ്ക്കുമ്പോള് വായ്ക്കുള്ളില് ഉണ്ടാകുന്ന മുറിവുകള്.
തടയാന് കഴിയാത്ത കാരണങ്ങള്
· കുടുംബപരമായ പ്രവണത / ജനിതകം.
· പോഷകക്കുറവ് – അയണ്, സിങ്ക്, ഫോളിക്ക് ആസിഡ്, വിറ്റാമിന് ബി, വിറ്റാമിന് സി.
· ചില മരുന്നുകള് – ഉദാ: എന് എസ് എ ഐ ഡി, ബീറ്റ ബ്ലോക്കറുകള്.
· ഹോര്മോണ് മാറ്റങ്ങള് – ഉദാ: ഗര്ഭധാരണം.
· പുകയില ഉപേക്ഷിച്ചതിനു ശേഷമുള്ള ആദ്യ ദിവസങ്ങളില് ഉണ്ടാകുന്ന അള്സറുകള്.
ഓറല് അള്സറുകള് ഉണ്ടാകുന്നതിന്റെ മറ്റു കാരണങ്ങള്
· കൈകാലുകളുടെയും വായുടെയും അസുഖങ്ങള്.
· ഓറല് ലൈക്കണ് പ്ലാനസ്.
· Crohn’s Disease / സീലിയാക് രോഗം.
· പ്രതിരോധശേഷിയില്ലായ്മ – എച്ച്ഐവി, ലൂപസ്.
വിവരങ്ങൾ – ഡോ. ധനശ്രീ എ. അയ്യങ്കാർ, ജൂണിയർ കൺസൾട്ടന്റ്, ഇഎൻടി, എസ് യു റ്റി ആശുപത്രി, പട്ടം, തിരുവനന്തപുരം
