മഹാരാഷ്ട്രയിലെ അകോല റെയിൽവേ സ്റ്റേഷനിൽ നീങ്ങിക്കൊണ്ടിരുന്ന ട്രെയിനിനും പ്ലാറ്റ്‌ഫോമിനും ഇടയിലെ വിടവിലേക്ക് വീഴാൻ തുടങ്ങിയ 55 കാരിയെ ആർപിഎഫ് ഉദ്യോഗസ്ഥ സാഹസികമായി രക്ഷപ്പെടുത്തി. അസിസ്റ്റന്‍റ് സബ് ഇൻസ്പെക്ടർ സോണൽ ഇംഗ്ലെ ആണ് സമയോചിതമായ ഇടപെടലിലൂടെ വയോധികയുടെ ജീവൻ രക്ഷിച്ചത്. കഴിഞ്ഞ ഏഴ് ദിവസത്തിനിടെ സ്റ്റേഷനിൽ നടക്കുന്ന ഇത്തരത്തിലുള്ള രണ്ടാമത്തെ രക്ഷാപ്രവർത്തനമാണിത്.
ഒക്ടോബർ 17ന് അകോല റെയിൽവേ സ്റ്റേഷനിലെ ഒന്നാം നമ്പർ പ്ലാറ്റ്‌ഫോമിൽ വെച്ചാണ് സംഭവം. നാഗ്പൂർ-അഹമ്മദാബാദ് പ്രേരണ എക്സ്പ്രസ് (22138) സ്റ്റേഷനിൽ നിന്ന് പോകുന്നതിനിടയിലാണ് അപകടമുണ്ടായത്. സംഗീത ഭാരത് ഖത്രി (Sangeeta Bharat Khatri) എന്ന സ്ത്രീ ട്രെയിനിൽ യാത്ര ചെയ്ത ബന്ധുവിനെ യാത്രയയക്കാൻ എത്തിയതായിരുന്നു.
ജൈനക്ഷേത്രത്തിലേക്ക് പോകുന്ന തീർത്ഥാടകരുടെ വൻ തിരക്കിനിടയിൽ, ട്രെയിൻ നീങ്ങിത്തുടങ്ങിയപ്പോൾ എതിർവശത്തുനിന്നോ മറ്റോ ഇറങ്ങാൻ ശ്രമിക്കുന്നതിനിടയിൽ സംഗീതയ്ക്ക് കാൽതെറ്റുകയും ട്രെയിനിനും പ്ലാറ്റ്‌ഫോമിനും ഇടയിലെ വിടവിലേക്ക് വീഴാൻ തുടങ്ങുകയും ചെയ്തു.
അടുത്ത് തന്നെ ഡ്യൂട്ടിയിലുണ്ടായിരുന്ന ആർ.പി.എഫ് ഉദ്യോഗസ്ഥ സോണൽ ഇംഗ്ലെ ഇത് കണ്ട് ഉടൻ തന്നെ ഓടിയെത്തി യുവതിയെ പിടിച്ച് പ്ലാറ്റ്‌ഫോമിലേക്ക് വലിച്ചെടുക്കുകയായിരുന്നു. വൻ ദുരന്തം ഒഴിവായ ആശ്വാസത്തിൽ സംഗീതയ്ക്കും കുടുംബത്തിനും പരിക്കുകളൊന്നുമില്ലാതെ രക്ഷപ്പെടാൻ സാധിച്ചു. ഈ സാഹസിക രക്ഷാപ്രവർത്തനത്തിന് ശേഷം സംഗീതയും കുടുംബവും സോണൽ ഇംഗ്ലെക്കും റെയിൽവേ അധികാരികൾക്കും നന്ദി അറിയിച്ചു.
സോണൽ ഇംഗ്ലെ അകോല സ്റ്റേഷനിൽ യാത്രക്കാരുടെ ജീവൻ രക്ഷിക്കുന്നത് ഇതാദ്യമായല്ല. ഒക്ടോബർ 10ന് അഹമ്മദാബാദ്-ചെന്നൈ നവ്ജീവൻ എക്സ്പ്രസിൽ (12655) കയറുന്നതിനിടയിൽ കാൽതെറ്റിവീണ ഭിന്നശേഷിക്കാരനായ വയോധികനെയും ഇതേ ഉദ്യോഗസ്ഥ കൃത്യസമയത്ത് ഇടപെട്ട് രക്ഷപ്പെടുത്തിയിരുന്നു.
