ബംഗളൂരുവിലെ തിരക്കേറിയ റോഡുകളും കനത്ത ഗതാഗതക്കുരുക്കും പലപ്പോഴും സോഷ്യൽ മീഡിയയിൽ വലിയ ചർച്ചകൾക്ക് വഴിവച്ചിട്ടുണ്ട്. എന്നാൽ, പലപ്പോഴും വിചാരിക്കുന്നതിനപ്പുറമാണ് സത്യങ്ങൾ എന്ന തിരിച്ചറിവാണ് സോഷ്യൽ മീഡിയ നല്കുന്നത്.
പൊതുധാരണയുമായി യാഥാർത്ഥ്യം എല്ലായ്പ്പോഴും പൊരുത്തപ്പെടുന്നില്ലെന്ന് ചൂണ്ടിക്കാട്ടി ഒരു വിദേശ വിനോദസഞ്ചാരി ഇപ്പോൾ വ്യത്യസ്തമായ ഒരു കാഴ്ചപ്പാട് പങ്കുവെച്ചിരിക്കുകയാണ്. ബംഗളൂരു നഗരം ശരിക്കും അലങ്കോലമാണോ എന്ന അടികുറിപ്പോടെയാണ് വിനോദസഞ്ചാരി വീഡിയോ പങ്കുവച്ചിരിക്കുന്നത്.
ലെൻ കുക്ക് നഗരത്തിലെ ഒരു തെരുവിലെ ദൃശ്യങ്ങളാണ് കാണിച്ചിരിക്കുന്നത്, ആ പ്രദേശം അത്രയൊന്നും ക്രമരഹിതമായി തനിക്ക് തോന്നിയില്ലെന്ന് അദ്ദേഹം ചൂണ്ടിക്കാട്ടി. ചുറ്റും സാധാരണ നിലയിലുള്ള തിരക്കുണ്ടായിരുന്നിട്ടും ആളുകൾ വളരെ ശാന്തമായി നീങ്ങുന്നത് വീഡിയോയിൽ കാണാം.
നഗരം എല്ലായ്പ്പോഴും അലങ്കോലവും ജനത്തിരക്കേറിയതും ശ്വാസം മുട്ടിക്കുന്നതുമാണെന്ന ധാരണ യാഥാർത്ഥ്യത്തെ പ്രതിഫലിപ്പിക്കുന്നില്ലെന്ന് അദ്ദേഹം പറഞ്ഞു. ബംഗളൂരുവിലെ ഏതോ ഒരു സ്ഥലത്ത്, ഏതോ ഒരു സമയത്ത് യാദൃശ്ചികമായി എടുത്ത വീഡിയോയാണിതെന്നും അവിടെ അസ്വാഭാവികമായ തിരക്കോ ബഹളമോ കാണാനില്ലെന്നും അദ്ദേഹം കൂട്ടിച്ചേർത്തു.
കടകളും കാൽനടയാത്രക്കാരും വാഹനങ്ങളുമുള്ള അത്യാവശ്യം തിരക്കുള്ള ഇടമായിരുന്നിട്ടും, പരിസരം വളരെ ശാന്തമായി അനുഭവപ്പെട്ടുവെന്ന് കുക്ക് നിരീക്ഷിച്ചു. നഗരത്തിലെ ഓരോ നിമിഷവും തിരക്കുപിടിച്ചതായിരിക്കണമെന്നില്ലെന്നും, തിരക്കേറിയ തെരുവുകൾ പോലും ചിലപ്പോൾ സമാധാനപരമായി കാണപ്പെടാമെന്നും അദ്ദേഹം വിശദീകരിച്ചു.
