ഫോണിന്റെ ബാറ്ററി പൊട്ടിത്തെറിച്ചുണ്ടാകുന്ന ധാരാളം അപകട വാർത്തകൾ നമ്മൾ കേട്ടിട്ടുണ്ട്. അത്തരമൊരു വാർത്തയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. മൊബൈൽ ഫോൺ നന്നാക്കുന്ന കടയിൽ നിന്നുള്ള സിസിടിവി ദൃശ്യങ്ങളാണ് ഇത്.
ബാറ്ററി കംപ്ലൈന്റ് ഉള്ള ഫോൺ നന്നാക്കുന്നതിനായി എത്തിയതായിരുന്നു ഒരു ആൺകുട്ടി. അവൻ കടയിൽവച്ച് കേടായ ബാറ്ററി കൈയിൽവച്ച് കറക്കുന്നതോടെയാണ് വീഡിയോയുടെ തുടക്കം. കൈയിൽ വച്ചിരുന്ന ബാറ്ററി അവൻ വായിൽകുറേ സമയം വയ്ക്കുന്നു. പിന്നീട് അതിൽ കടിച്ചു. കടിവീണതും ബാറ്ററി പൊട്ടിത്തെറിച്ചതും ഒരേപോലെയായിരുന്നു. പെട്ടെന്ന് ബാറ്ററിപൊട്ടി തീ പടർന്നു. അവന്റെ മുഖവും വായുമെല്ലാം പൊള്ളിപ്പോയി. വെപ്രാളത്തിൽ അവൻ ബാറ്ററി എടുത്ത് കടയ്ക്കുള്ളിലേക്ക് വലിച്ചെറിഞ്ഞു. അത് ആളിക്കത്താൻ തുടങ്ങി. ഒരു നിമിഷത്തെ അശ്രദ്ധ മൂലം വരുത്തിവച്ച ആപത്തായിരുന്നു അത്. കടയിലേക്ക് വലിച്ചെറിഞ്ഞ ബാറ്ററി മറ്റൊരു ജീവനക്കാരൻ പുറത്തേക്ക് എറിയുന്നതും കാണാം. ഇതെല്ലാം ഒറ്റ നിമിഷത്തിൽ സംഭവിച്ച കാര്യങ്ങളാണ്.
ഗുരുതരമായി പൊള്ളലേറ്റ കുട്ടിയെ ആശുപത്രിയിൽ പ്രവേശിപ്പിച്ചു. ലിഥിയം സെല്ലിലെ സമ്മർദ്ദവും കേടുപാടുകളുമാണ് ശക്തമായ സ്ഫോടനത്തിന് കാരണമായത്.
സംഭവത്തിന്റെ വീഡിയോ സോഷ്യൽ മീഡിയയിൽ വൈറലായതോടെ നിരവധി ആളുകൾ ആശങ്ക പങ്കുവച്ചു. ഫോൺ ബാറ്ററികൾ ഒരിക്കലും ചൂട്, മൂർച്ചയുള്ള വസ്തുക്കൾ, മർദ്ദം അല്ലെങ്കിൽ ഈർപ്പം എന്നിവയ്ക്ക് വിധേയമാകരുതെന്ന് പലരും മുന്നറിയിപ്പ് നൽകി.
