കോഴിക്കോട്: തിരുവമ്പാടി പുന്നയ്ക്കലില് കാറിനുള്ളിൽ കത്തിക്കരിഞ്ഞ നിലയില് മൃതദേഹം കണ്ടെത്തി. പുന്നയ്ക്കല് സ്വദേശി അഗസ്റ്റിന് ജോസഫാണ് മരിച്ചതെന്നാണ് പ്രാഥമിക വിവരം. തിരുവമ്പാടി പുന്നയ്ക്കല് ചപ്പാത്ത് റോഡിലാണ് സംഭവം.
ഇന്നലെ രാത്രി 12ന് ഇതുവഴി വന്ന ബൈക്ക് യാത്രക്കാരനാണ് കത്തുന്ന നിലയില് കാര് കണ്ടത്. ഉടൻ തന്നെ തിരുവന്പാടി പോലീസില് വിവരമറിയിച്ചു. പോലീസ് എത്തി തൊട്ടടുത്ത തോട്ടിൽ നിന്ന് വെള്ളമെടുത്ത് തീ അണച്ചു. അപ്പൊഴേക്കും കാർ പൂർണമായും കത്തിയിരുന്നു.
കാർ നമ്പറും ആര്സി ഓണറെ കുറിച്ചും പരിശോധിച്ചപ്പോഴാണ് പുന്നയ്ക്കല് സ്വദേശി അഗസ്റ്റിനാണെന്ന് വ്യക്തമായത്. മൃതദേഹം കോഴിക്കോട് മെഡിക്കല് കോളജ് ആശുപത്രിയിലേക്ക് മാറ്റി. സംഭവത്തെ കുറിച്ച് പോലീസ് അന്വേഷണം നടത്തുന്നു. സ്ഥലത്ത് ഫൊറൻസിക് സംഘം പരിശോധനകൾ നടത്തുകയാണ്. ആത്മഹത്യയെന്നാണ് പോലീസിന്റെ സംശയം.