നഷ്ടപ്പെട്ട തന്‍റെ സർട്ടിഫിക്കറ്റുകൾക്കായി നിറകണ്ണുകളായി സോഷ്യൽ മീഡിയയിൽ പറഞ്ഞ ആ വാക്കുകളുടെ വേദന ബാഗ് കൊണ്ടുപോയവരും കണ്ടു കാണുമോ? ഗൂഢല്ലൂർ സ്വദേശ വിഷ്ണു പ്രസാദിന്‍റെ കരച്ചിലിനും പ്രാർഥനയ്ക്കും ഒടുവിൽ ഫലം കണ്ടു. നഷ്ടപ്പെട്ട സര്‍ട്ടിഫിക്കറ്റുകളും മറ്റു രേഖകളും തിരിച്ചുകിട്ടി.
ഞായറാഴ്ച തൃശൂരില്‍ നിന്ന് കൊച്ചിയിലേക്ക് പോകുന്നതിനായി റെയില്‍വേ സ്റ്റേഷനിലിരിക്കുമ്പോഴാണ് സര്‍ട്ടിഫിക്കറ്റുകളടങ്ങിയ ബാഗ് നഷ്ടപ്പെട്ടത്. ജര്‍മന്‍ കപ്പലില്‍ ജോലി ലഭിച്ച വിഷ്ണു ഒറിജിനല്‍ സര്‍ട്ടിഫിക്കറ്റുകള്‍ ഹാജരാക്കാനായി കമ്പനിയിലേക്ക് പോകുന്നതിനിടെയായിരുന്നു ഇത്.
തൃശൂര്‍ വടക്കുംനാഥ ക്ഷേത്രത്തിന് സമീപത്ത് നിന്നാണ് ബാഗ് തിരികെ ലഭിച്ചതെന്ന് വിഷ്ണു പറഞ്ഞു. തൃശൂര്‍ റെയില്‍വേ സ്‌റ്റേഷനിലെ കാത്തിരിപ്പുമുറിയില്‍ നിന്നാണ് ബാഗ് നഷ്ടപ്പെട്ടത്. പോലീസിലില്‍ പരാതി നല്‍കി നാല് ദിവസത്തോളം അന്വേഷണം നടത്തിയെങ്കിലും ബാഗ് ലഭിച്ചിരുന്നില്ല. പാസ്‌പ്പോര്‍ട്ടും കപ്പലില്‍ യാത്ര ചെയ്യാനുള്ള അനുമതിയുമടക്കം ബാഗിലുണ്ടായിരുന്നു. ഈ ഒറിജിനല്‍ രേഖകള്‍ കാണിച്ചാലെ ജോലി ലഭിക്കുമായിരുന്നുള്ളൂ.
ഇതോടെ വിഷ്ണുവിന്‍റെ ബാഗ് മോഷണം പോയ വിവരമടങ്ങിയ വാര്‍ത്ത സാമൂഹിക മാധ്യമങ്ങളില്‍ പ്രചരിച്ചു. സിനിമാ താരങ്ങളടക്കം വിഷ്ണുവിന് വേണ്ടി രംഗത്തെത്തി. ബാഗ് ആരെടുത്താലും സര്‍ട്ടിഫിക്കറ്റുകള്‍ മാത്രം തിരിച്ചേല്‍പ്പിക്കണമെന്നായിരുന്നു വിഷ്ണുവിന്‍റെ അഭ്യർഥന. അന്വേഷണം നടക്കുന്നതിനിടെയാണ് ബാഗ് തൃശൂരിൽ നിന്ന് തന്നെ ലഭിച്ചത്.
