ചേർത്തല: പാണാവള്ളിയിൽ മുൻവൈരാഗ്യത്തിന്റെ പേരിൽ വയോധികനെ തെങ്ങിൽ കെട്ടിയിട്ട് മർദിച്ച സംഭവത്തിൽ പോലീസ് കേസെടുത്തു. പാണാവള്ളി പഞ്ചായത്ത് അഞ്ചാം വാർഡ് തൃച്ചാറ്റുകുളം കുഴിപ്പറമ്പ് നികർത്തിൽ വിജയനാണ് (64) ആക്രമണത്തിനിരയായത്.
അയൽവാസിയും കുടുംബാംഗങ്ങളും ചേർന്ന് കെട്ടിയിട്ട് ആക്രമിക്കുകയായിരുന്നു. തടയാനെത്തിയ കുടുംബാംഗങ്ങൾക്കും മർദനേമറ്റു. സംഭവത്തിൽ അയൽവാസി സത്താറിനും മക്കൾ ഉൾപ്പെടെ അഞ്ചുപേർക്കെതിരെ പൂച്ചാക്കൽ പോലീസ് കേസെടുത്തു. ഈമാസം ഏഴിന് രാത്രി 8.30നായിരുന്നു സംഭവം. വിജയനെ നേരത്തെ ആക്രമിച്ച കേസ് കോടതിയിലാണ്. അതിന്റെ വിരോധത്തിലാണ് വിജയനെ വലിച്ചിഴച്ച് പ്രതികളുടെ വീട്ടുമുറ്റത്ത് എത്തിച്ച് ക്രൂരമായി ആക്രമിച്ചതെന്ന് പൂച്ചാക്കൽ പോലീസ് രജിസ്റ്റർ ചെയ്ത എഫ്ഐആറിൽ പറയുന്നു.
ഉടുമുണ്ടുരിഞ്ഞും തെങ്ങിൽ കെട്ടിയിട്ടുമാണ് കൂട്ടംചേർന്ന് ആക്രമിച്ചത്. വിജയന്റെ മൂക്കിന്റെ അസ്ഥിക്ക് പൊട്ടലുണ്ട്. സമൂഹമാധ്യമങ്ങളിലൂടെ മർദനദൃശ്യം പുറത്തുവന്നിട്ടുണ്ട്.
