കൊച്ചി: എറണാകുളം നോര്‍ത്ത് റെയില്‍വേ സ്റ്റേഷനിലെ സുരക്ഷ ഭേദിച്ച് രണ്ടാം പ്ലാറ്റ്‌ഫോമില്‍ യാത്രക്കാര്‍ക്കിടയിലൂടെ ആഡംബര ബൈക്ക് ഓടിച്ച സംഭവത്തില്‍ പ്രതി ഒളിവില്‍ തുടരുന്നു. ബൈക്ക് ഓടിച്ചത് പെരുമ്പാവൂര്‍ മുടിക്കല്‍ സ്വദേശി അജ്മല്‍ ആണെന്ന് റെയില്‍വേ പോലീസ് കണ്ടെത്തിയിരുന്നു.
നേരത്തെ ലഹരി കേസിലെ പ്രതിയായ അജ്മലിനായുള്ള അന്വേഷണം പ്രത്യേക അന്വേഷണസംഘം ഊര്‍ജിതമാക്കി. ഇയാള്‍ പോകാനിടയുള്ള സ്ഥലങ്ങളിലും സിസിടിവി കേന്ദ്രീകരിച്ചുമാണ് അന്വേഷണം പുരോഗമിക്കുന്നത്. റെയില്‍വേ പോലീസിലെ പ്രത്യേകസംഘമാണ് കേസ് അന്വേഷിക്കുന്നത്.
കഴിഞ്ഞ ചൊവ്വാഴ്ച പുലര്‍ച്ചെ 4.40ന് പൂനെ കന്യാകുമാരി എക്‌സ്പ്രസ് കടന്നുപോയതിന് തൊട്ടുപിന്നാലെയായിരുന്നു പെരുമ്പാവൂര്‍ മുടിക്കല്‍ സ്വദേശി അജ്മല്‍ ബൈക്കുമായി പ്ലാറ്റ്‌ഫോമില്‍ എത്തിയത്. ഈസമയം മറ്റൊരു ട്രെയിന്‍ സ്റ്റേഷനിലേക്ക് കടന്നുവരുന്നുണ്ടായിരുന്നു. നിരവധി യാത്രക്കാര്‍ പ്ലാറ്റ്‌ഫോമില്‍ ഉണ്ടായിരുന്ന സമയത്തായിരുന്നു അജ്മലിന്‍റെ സാഹസം. ആഡംബര ബൈക്ക് ഇയള്‍ വാടകയ്‌ക്കെടുത്തതാണെന്ന് കണ്ടെത്തിയിട്ടുണ്ട്.
നാല് ലക്ഷം രൂപ വിലമതിക്കുന്ന ജി310ആര്‍ മോഡല്‍ ബിഎംഡബ്ല്യു ബൈക്ക് ആണ് പോലീസ് പിന്തുടര്‍ന്നതോടെ യുവാവ് ഉപേക്ഷിച്ച് കടന്നുകളഞ്ഞത്. സംഭവത്തില്‍ സുരക്ഷാ വീഴ്ചയുണ്ടായ സാഹചര്യവും പരിശോധിക്കുന്നുണ്ട്.
