ശബരിമല: തീർഥാടന കാലത്ത് ശബരിമലയിൽ പ്രശ്നങ്ങളുണ്ടാക്കുന്നതിന് പിന്നിൽ രാഷ്ട്രീയമില്ലെന്ന് ദേവസ്വം മന്ത്രി കെ. മുരളീധരൻ. ടെൻഡർ ലഭിക്കാത്തവരും കച്ചവട താത്പര്യക്കാരുമാണ് ബഹളത്തിന് ഇറങ്ങിയിരിക്കുന്നതെന്ന് മന്ത്രി പറഞ്ഞു.
ശബരിമലയിൽ തീർഥാടന കാലത്ത് ബോധപൂർവം പ്രതിസന്ധി സൃഷ്ടിക്കാൻ ചില ക്ഷുദ്രശക്തികൾ ശ്രമിക്കുന്നുണ്ടെന്നും ഭക്ഷണത്തിൽ പോലും വിഷം ചേർക്കാൻ കെൽപ്പുള്ളവർ ഇക്കൂട്ടത്തിലുണ്ടെന്നും കെ. മുരളീധരൻ അഭിപ്രായപ്പെട്ടു.
കഴിഞ്ഞ ദിവസം ശബരിമലയിലെ ടോയ്ലറ്റിലെ വാൽവ് അടച്ചിട്ടതും ഇന്ന് പുലർച്ചെ ഒരാൾ ബഹളമുണ്ടാക്കിയതും ഉൾപ്പെടെയുള്ള സംഭവങ്ങൾ ഗൗരവത്തോടെയാണ് കാണുന്നത്. സംഭവത്തിൽ ദേവസ്വം ബോർഡ് തന്നെ പൊലിസിനോട് അന്വേഷണം ആവശ്യപ്പെട്ടിട്ടുണ്ടെന്നും മന്ത്രി വ്യക്തമാക്കി.
ഇന്റലിജൻസ് വിഭാഗത്തോട് വിഷയം സസൂക്ഷ്മം പരിശോധിക്കാൻ നിർദേശിച്ചിട്ടുണ്ട്. ഹൈക്കോടതിയുടെ മേൽനോട്ടത്തിലാണ് ശബരിമലയിലെ എല്ലാ കാര്യങ്ങളും നടക്കുന്നതെന്നും ഇതുവരെയുള്ള ക്രമീകരണങ്ങളിൽ താൻ പൂർണ സംതൃപ്തനാണെന്നും മന്ത്രി പറഞ്ഞു.
ഒരു പിശുക്കും കൂടാതെ മുഖ്യമന്ത്രി എല്ലാ കാര്യങ്ങൾക്കും പണം അനുവദിക്കുന്നുണ്ടെന്നും ചെറിയ പാളിച്ചകൾ പോലും സംഭവിക്കാതിരിക്കാൻ കർശന മുൻകരുതലുകൾ സ്വീകരിച്ചിട്ടുണ്ടെന്നും മുരളീധരൻ കൂട്ടിച്ചേർത്തു.
