കോട്ടയം: പുതുവര്ഷത്തെ വരവേല്ക്കാനൊരുങ്ങി കോട്ടയം മോസ്കോ-വടവാതൂര് ബണ്ട് റോഡില് ഇത്തവണയും കോട്ടയം കാര്ണിവലിനുള്ള ഒരുക്കങ്ങള് പൂര്ത്തിയായി. ഏകദേശം 50 അടിയിലധികം ഉയരത്തിലുള്ള കൂറ്റന് പാപ്പാഞ്ഞിയെ കത്തിച്ചാണു പുതുവര്ഷമായ 2026നെ വരവേല്ക്കുന്നത്. ഇതിനായി മീനന്തറയാറിന്റെ സമീപമുള്ള പാടശേഖരത്തില് പാപ്പാഞ്ഞി നിര്മാണം അവസാന മിനുക്കുപണിയിലാണ്.
ഇന്നു രാത്രി ഏഴുമുതല് കലാപരിപാടികള്, ഗാനമേള, ഡിജെ പാര്ട്ടി, ആകാശവിസ്മയം എന്നിവയോടെയാണു കാര്ണിവല് ഒരുങ്ങുന്നത്.ജില്ലയിലെ ഗ്രാമീണ ടൂറിസം മേഖല എന്ന നിലയില് ശ്രദ്ധനേടുന്ന വടവാതൂര് ബണ്ട് റോഡിന്റെ സൗന്ദര്യകാഴ്ചകളും കാര്ണിവല് ആഘോഷത്തിന്റെ ഹൈലൈറ്റാണ്. വിജയപുരം പഞ്ചായത്തിന്റെ മീനന്തറ ടൂറിസം പദ്ധതിയുടെ ഭാഗമായിട്ടാണു കോട്ടയം കാര്ണിവല് സൊസൈറ്റിയുടെ നേതൃത്വത്തില് പുതുവര്ഷ ആഘോഷ പരിപാടി സംഘടിപ്പിക്കുന്നത്.
പതിനയ്യായിരത്തോളം ആളുകളെയാണ് ഇത്തവണ സംഘാടകര് പ്രതീക്ഷിക്കുന്നത്. സുരക്ഷാ സംവിധാനങ്ങള് ഉള്പ്പെടെ ഒരുക്കങ്ങള് പൂര്ത്തിയായി. തിരുവഞ്ചൂര് രാധാകൃഷ്ണന് എംഎല്എ കാര്ണിവല് ഉദ്ഘാടനം ചെയ്യും. സൊസൈറ്റി പ്രസിഡന്റും വിജയപുരം പഞ്ചായത്തംഗവുമായ വി.ടി സോമന് കുട്ടി, ബ്ലോക്ക് ഡിവിഷന് മെമ്പര് ലിബി ജോസ് ഫിലിപ്പ് തുടങ്ങിയവര് പങ്കെടുക്കും.
ബാരിക്കേഡ് ഉള്പ്പെടെ എല്ലാ സുരക്ഷാ സംവിധാനങ്ങളും സൊസൈറ്റി അംഗങ്ങളുടെ നേതൃത്വത്തില് അഞ്ഞൂറംഗ വോളന്റിയര്മാരും പോലീസ്, ഫയര്ഫോഴ്സ്, സ്വകാര്യ സുരക്ഷാ ഉദ്യോഗസ്ഥരും ഉള്പ്പെടെ വിപുലമായ സുരക്ഷാ സംവിധാനം ക്രമീകരിച്ചിട്ടുണ്ട്.
