മമ്മൂട്ടിയെ നായകനാക്കി നിതിന്‍ രണ്‍ജി പണിക്കര്‍ സംവിധാനം ചെയ്ത ചിത്രമായിരുന്നു കസബ. കസബയിലെ സ്ത്രീവിരുദ്ധത ആഘോഷിക്കപ്പെടുന്നതിനെതിരേ നടി പാര്‍വതി തിരുവോത്ത് പരസ്യമായി രംഗത്ത് വന്നത് അന്നു വിവാദമായിരുന്നു. പാര്‍വതിക്കെതിരേ മമ്മൂട്ടി ആരാധകര്‍ സൈബര്‍ ആക്രമണം നടത്തുകയും ചെയ്തു.
കസബ സിനിമയുമായി ബന്ധപ്പെട്ടുണ്ടായ തന്‍റെ പരാമര്‍ശത്തില്‍ താന്‍ ഇപ്പോഴും ഉറച്ചു നില്‍ക്കുന്നുവെന്ന് ആവര്‍ത്തിച്ചിരിക്കുകയാണ് പാര്‍വതി ഇപ്പോള്‍.മമ്മൂട്ടിയോടൊപ്പം പുഴു എന്ന സിനിമയില്‍ അഭിനയിക്കാന്‍ തയാറെടുക്കുകയാണ് പാര്‍വതി.
കസബ വിവാദവും പുഴുവും തമ്മിലുള്ള ബന്ധപ്പെടുത്തലിനെ കുറിച്ച് നല്‍കിയ അഭിമുഖത്തിലായിരുന്നു നടി മുമ്പുണ്ടായ വിവാദത്തെക്കുറിച്ചും പറഞ്ഞത്. കസബയുമായി ബന്ധപ്പെട്ടുണ്ടായ വിവാദം തെറ്റിദ്ധാരണയാണെന്നും മമ്മൂട്ടിയോടായിരുന്നില്ല എന്നും മറിച്ച് സിനിമയോടായിരുന്നു തന്‍റെ എതിര്‍പ്പെന്നും പാര്‍വതി പറഞ്ഞു.
ഞാന്‍ മുമ്പും പറഞ്ഞിട്ടുണ്ട്. അദ്ദേഹമൊരു അസാധ്യ നടനാണ്. അദ്ദേഹത്തിന്‍റെ അഭിനയം കണ്ടു തന്നെയാണ് ഞാനും വളര്‍ന്നത്. പക്ഷെ ഞാന്‍ അന്ന് പറഞ്ഞ രാഷ്‌ട്രീയത്തില്‍ തന്നെയാണ് ഇന്നും ഉറച്ചു നില്‍ക്കുന്നത്. അതില്‍ മാറ്റമൊന്നുമില്ല. അതിന് അദ്ദേഹവുമായി യാതൊരു ബന്ധവുമില്ല.
ഞാന്‍ അദ്ദേഹത്തിനെതിരേ ഒന്നും പറഞ്ഞിരുന്നില്ല. ഞാനും അദ്ദേഹവും തമ്മിലായിരുന്നില്ല പ്രശ്നം. എന്‍റെ പ്രശ്നം സിനിമയോടായിരുന്നു. പക്ഷെ അടുത്ത ദിവസം വന്ന ചില പത്രങ്ങളില്‍ കണ്ടത് പാര്‍വതി മമ്മൂട്ടിക്കെതിരേ എന്നാണ്. അവര്‍ക്ക് വേണ്ടത് വിവാദമാണ്. പക്ഷെ സത്യം നമുക്കറിയാമല്ലോ.- പാര്‍വതി പറഞ്ഞു.
