മഞ്ചേരി: പ്രായപൂർത്തിയാകാത്ത പെണ്‍കുട്ടിയെ ലൈംഗിക പീഡനത്തിന് വിധേയയാക്കിയെന്ന കേസിൽ മഞ്ചേരി സിഐ അറസ്റ്റ് ചെയ്ത പ്രതിയെ ജില്ലാ സെഷൻസ് ജഡ്ജി എസ്.എസ് വാസൻ 14 ദിവസത്തേക്ക് റിമാൻഡ് ചെയ്തു. മലപ്പുറം കോഡൂർ കരീപ്പറന്പ് ലക്ഷം വീട് കോളനിയിലെ മച്ചിങ്ങൽ ഹാരിസി (37)നെയാണ് റിമാൻഡ് ചെയ്തത്.
ഇക്കഴിഞ്ഞ 29നാണ് കേസിനാസ്പദമായ സംഭവം. ഒരാഴ്ച മുന്പ് മലപ്പുറത്തെ ഹോട്ടലിൽ വച്ച് പരിചയപ്പെട്ട പതിനേഴുകാരിയെ വിവാഹ വാഗ്ദാനം നൽകുകയും ഫോണ് നന്പർ വാങ്ങുകയുമായിരുന്നു. ഇക്കഴിഞ്ഞ തിങ്കളാഴ്ച രാവിലെ എട്ടിനു ഫോണിൽ വിളിച്ചു വരുത്തി ഓട്ടോറിക്ഷയിൽ മലപ്പുറത്തെ ലോഡ്ജിൽ എത്തിച്ച് പീഡിപ്പിച്ചുവെന്നാണ് പരാതി. ബസിൽ തിരികെ മഞ്ചേരിയിലെത്തി പെണ്‍കുട്ടി വീട്ടുകാരോടു വിവരം പറയുകയും തുടർന്നു കുടുംബത്തോടൊപ്പം പോലീസ് സ്റ്റേഷനിലെത്തി പരാതി നൽകുകയുമായിരുന്നു.
നേരത്തെ സൗദിയിൽ സമാനമായ കേസിൽ ശിക്ഷിക്കപ്പെട്ട പ്രതി നാലു വർഷം ജയിൽ വാസം അനുഭവിച്ചിട്ടുണ്ട്. മഞ്ചേരി സിഐ എൻ.ബി ഷൈജുവിന്‍റെ നേതൃത്വത്തിൽ എസ്ഐ എസ്.ബി കൈലാസ്നാഥ്, പ്രത്യേക അന്വേഷണ സംഘാംഗങ്ങളായ എഎസ്ഐ അബ്ദുൾ അസീസ്, പി. സഞ്ജീവ്, ഉണ്ണികൃഷ്ണൻ മാരാത്ത്, ടി. ശ്രീകുമാർ എന്നിവരാണ് അന്വേഷണം നടത്തിയത്.
