പയ്യന്നൂര്: ഷെയര് മാര്ക്കറ്റിംഗിലൂടെ ഓണ്ലൈന് തട്ടിപ്പ് നടത്തിയ കേസിലെ പ്രതി അറസ്റ്റില്. കോഴിക്കോട് മുക്കം സ്വദേശി കെ.പി. മുഹമ്മദ് സലീമിനെ ആണ് സൈബര് സെല് ഇന്സ്പെക്ടര് കൃഷ്ണകുമാര് അറസ്റ്റ് ചെയ്തത്. ഇയാളെ കോടതി റിമാന്ഡ് ചെയ്തു.
2024 ജൂലൈ മൂന്നു മുതല് 23 വരെയാണ് പരാതിക്ക് ആസ്പദമായ സംഭവം. പയ്യന്നൂര് അമ്പലം റോഡില് താമസിക്കുന്ന വി.വി. ഗണേശനാണ് പരാതിക്കാരൻ. ഇയാളുടെ ഫെഡറല് ബാങ്കിലെയും യൂക്കോ ബാങ്കിലേയും അക്കൗണ്ടുകളില് നിന്ന് ഷെയര് മാര്ക്കറ്റില് തുക നിക്ഷേപിച്ചാല് കൂടുതല് ലാഭം ലഭിക്കുമെന്ന് പറഞ്ഞ് വിശ്വസിപ്പിച്ചാണ് തട്ടിപ്പ് നടത്തിയത്.
ജിഎസ്എഎം എന്ന സ്ഥാപനത്തിന്റെ പേരില് പരാതിക്കാരനെ വാട്സാപ്പ് വഴി ബന്ധപ്പെട്ടാണ് തട്ടിപ്പിന് കളമൊരുക്കിയത്. ഈ സ്ഥാപനത്തിന്റെ വിവിധ അക്കൗണ്ടുകളിലേക്ക് പല തവണകളിലായി 97,40,000 രൂപ ഓണ്ലൈന് നിക്ഷേപമായി സ്വീകരിച്ചു.
അതിനുശേഷം നിക്ഷേപതുകയോ വാഗ്ദാനം ചെയ്ത ലാഭമോ തിരിച്ചു നല്കാതെ വഞ്ചിച്ചതായ പരാതിയില് പയ്യന്നൂര് പോലീസ് നേരത്തെ കേസെടുത്തിരുന്നു. ഇതേത്തുടര്ന്നുള്ള സൈബര് സെല് നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.
