ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ സ്പൈസ്‌ജെറ്റ് ജീവനക്കാരും യാത്രക്കാരും തമ്മിൽ രൂക്ഷമായ വാഗ്വാദം. വിമാനക്കമ്പനി ജീവനക്കാരിലൊരാൾ ‘ടിക്കറ്റ് നിരക്ക് കുറവായതുകൊണ്ടാണ് നിങ്ങൾ സ്പൈസ്‌ജെറ്റിൽ യാത്ര ചെയ്യാൻ വന്നത്’ എന്ന് പറഞ്ഞതാണ് യാത്രക്കാരെ ചൊടിപ്പിച്ചത്. സംഭവത്തിന്‍റെ വീഡിയോ സമൂഹമാധ്യമങ്ങളിൽ വൻതോതിൽ പ്രചരിക്കുന്നുണ്ട്.
എക്സ് പ്ലാറ്റ്‌ഫോമിൽ പങ്കുവെച്ച വീഡിയോയിൽ, കൗണ്ടറിന് മുന്നിൽ തടിച്ചുകൂടിയ യാത്രക്കാർ ജീവനക്കാർക്ക് നേരെ ബഹളം വെക്കുന്നതും ചൂണ്ടിക്കാണിച്ചു സംസാരിക്കുന്നതും കാണാം. ഈ സമയത്ത് സ്ഥിതിഗതികൾ നിയന്ത്രിക്കാൻ സിഐഎസ്എഫ് ഉദ്യോഗസ്ഥരും സ്ഥലത്തുണ്ടായിരുന്നു.
തർക്കത്തിനിടയിൽ “സ്പൈസ്‌ജെറ്റ് നിരക്ക് കുറഞ്ഞതായതുകൊണ്ടാണ് നിങ്ങൾ ഇതിൽ വന്നത്” എന്ന് ജീവനക്കാരൻ പറഞ്ഞതോടെ യാത്രക്കാരുടെ പ്രതിഷേധം ഇരട്ടിച്ചു. തുടര്‍ന്ന് കോപാകുലരായ യാത്രക്കാർ കൗണ്ടറിന് മുന്നിൽ തടിച്ചുകൂടുകയും “സ്പൈസ്‌ജെറ്റിന് നാണംകേട്” എന്ന് ഉറക്കെ മുദ്രാവാക്യം വിളിക്കുകയും ചെയ്തു. കൂട്ടത്തിലൊരു യാത്രക്കാരി ജീവനക്കാരുടെ ശമ്പളത്തെക്കുറിച്ചും രോഷത്തോടെ സംസാരിക്കുന്നത് വീഡിയോയിൽ കേൾക്കാം.
തർക്കത്തിന് കൃത്യമായ കാരണം എന്താണെന്ന് വീഡിയോയിൽ വ്യക്തമല്ലെങ്കിലും, വിമാനത്താവളത്തിലെ വൻ പ്രതിഷേധവും സംഘർഷാവസ്ഥയും ദൃശ്യങ്ങളിൽ വ്യക്തമാണ്.
സമീപദിവസങ്ങളിൽ ഇത് രണ്ടാം തവണയാണ് സ്പൈസ്‌ജെറ്റ് ജീവനക്കാരും യാത്രക്കാരും തമ്മിൽ തർക്കമുണ്ടാകുന്നത്. കഴിഞ്ഞ ദിവസങ്ങളിൽ കൊൽക്കത്ത വിമാനത്താവളത്തിലും സമാനമായ രീതിയിൽ യാത്രക്കാരും സ്പൈസ്‌ജെറ്റ് ജീവനക്കാരും തമ്മിൽ വാഗ്വാദമുണ്ടായതിന്റെ വീഡിയോ പുറത്തുവന്നിരുന്നു.
