വെറും രോമത്തിൽനിന്ന്, അതും ആടിന്‍റെ രോമത്തിൽനിന്ന് ഇങ്ങനെയൊരു കണ്ടുപിടിത്തമോ? ആരും അദ്ഭുതപ്പെടുന്ന കണ്ടെത്തലുകളാണ് ലണ്ടൻ കിംഗ്സ് കോളജിലെ ഗവേഷകർ പുറത്തുവിട്ടിരിക്കുന്നത്. ഭാവിയിൽ അസ്ഥിരോഗ ചികിത്സാരംഗത്തു വലിയ വിപ്ലവം സൃഷ്ടിക്കുന്ന കണ്ടെത്തൽ എന്താണെന്നല്ലേ?
ആടിന്‍റെ രോമത്തിൽനിന്നു വേർതിരിച്ചെടുത്ത പ്രത്യേക ‘പദാർഥം’ അസ്ഥികളിലെ കേടുപാടുകൾ പരിഹരിക്കാൻ ഉപയോഗിക്കാമെന്നാണ് ആ സുപ്രധാന കണ്ടെത്തൽ. ഇതുപയോഗിച്ച് എലികളിലെ കേടുപാടുകൾ സംഭവിച്ച അസ്ഥികൾ വിജയകരമായി പുനർനിർമിച്ചെന്നു ഗവേഷകർ വ്യക്തമാക്കി. പരമ്പരാഗതമായി ഉപയോഗിക്കുന്ന കൊളാജൻ മെംബ്രെയ്നുകളേക്കാൾ മികച്ച ‘ബോൺ സെൽ’ ആണ് നിർമിച്ചതെന്നും ഗവേഷകർ വ്യക്തമാക്കി.
ആടിന്‍റെ രോമത്തിൽ കാണപ്പെടുന്ന സ്ട്രക്‌ചറൽ ‘കെരാറ്റിൻ’ എന്ന പ്രോട്ടീൻ ഉപയോഗിച്ചാണു പ്രത്യേക മെംബ്രെയ്നുകൾ വികസിപ്പിച്ചെടുത്തത്. അന്താരാഷ്‌ട്ര ശാസ്ത്ര മാസികയിൽ ഇതുമായി ബന്ധപ്പെട്ട ഗവേഷണ റിപ്പോർട്ട് പ്രസിദ്ധീകരിച്ചിട്ടുണ്ട്. ലാബിൽ, ഗവേഷണത്തിന്‍റെ ആദ്യഘട്ടത്തിൽ മനുഷ്യരിലെ അസ്ഥികോശങ്ങളിലാണ് ഈ ‘കെരാറ്റിൻ മെംബ്രെയ്നു’കൾ പരീക്ഷിച്ചത്. ഇവയിൽ കോശങ്ങൾ വേഗത്തിൽ വളരുകയും അസ്ഥി രൂപീകരണം സംഭവിക്കുകയും ചെയ്തു. തുടർന്ന്, സ്വയം സുഖപ്പെടാൻ സാധിക്കാത്ത വിധം തലയോട്ടിയിൽ വലിയ ക്ഷതങ്ങളുള്ള എലികളിൽ ഇതു പരീക്ഷിച്ചു. ഇതും വിജയകരമായിരുന്നു.
സുഖപ്പെടുന്ന സമയമത്രയും മാറ്റമില്ലാതെ നിൽക്കാനും പുതിയ അസ്ഥികൾ വളരാൻ അനുയോജ്യമായ പ്രതലം നൽകാനും തക്കവണ്ണമാണ് കെരാറ്റിൻ മെംബ്രെയ്നുകൾ ഗവേഷകർ രൂപപ്പെടുത്തിയത്.
ആഴ്ചകളോളം നീണ്ട നിരീക്ഷണത്തിൽ, എലികളുടെ കേടുപാടുകൾ സംഭവിച്ച അസ്ഥികളിൽ പുതിയ അസ്ഥികൾ വിജയകരമായി പുനരുജ്ജീവിച്ചതായി ഗവേഷസംഘത്തിനു കണ്ടെത്താൻ കഴിഞ്ഞു.
പരീക്ഷണത്തിൽ കൊളാജൻ മെംബ്രെയ്നുകൾ കൂടുതൽ അസ്ഥികൾ രൂപപ്പെടുത്തിയെങ്കിലും, കെരാറ്റിൻ ഉപയോഗിച്ചപ്പോഴുണ്ടായ അസ്ഥികളിൽ ഘടനാപരമായ ക്രമീകരണവും ആരോഗ്യകരമായ അസ്ഥികൾക്കു സമാനമായ കോശവിന്യാസവും ഗവേഷകർ നിരീക്ഷിച്ചു. മാത്രമല്ല, കെരാറ്റിൻ മെംബ്രെയ്നുകൾ ചുറ്റുമുള്ള കോശങ്ങളുമായി പൂർണമായും സമന്വയിച്ചതായും ഗവേഷകർക്കു കണ്ടെത്താൻ കഴിഞ്ഞു.
ഗവേഷണം തുടരുന്നു
അസ്ഥിസംബന്ധമായ ചികിത്സയ്ക്ക് ആടിന്‍റെ രോമത്തിൽനിന്നു നിർമിച്ച പദാർഥം വിജയകരമായി പരീക്ഷിക്കാൻ കഴിഞ്ഞതിന്‍റെ ആത്മവിശ്വാസത്തിലാണു ഗവേഷകർ. അസ്ഥി പുനരുജ്ജീവനത്തിനായുള്ള വസ്തുക്കളുടെ വിഭാഗത്തിൽ ‘കെരാറ്റിൻ’ ഒരു പുതിയ വഴിത്തിരിവാണെന്നും പഠനം ചൂണ്ടിക്കാണിക്കുന്നു. തന്നെയുമല്ല, പുതിയ കണ്ടെത്തൽ പരിസ്ഥിതിസൗഹൃദവുമാണ്. പ്രകൃതിദത്തവും പുനരുപയോഗിക്കാവുന്നതുമായ ആടിന്‍റെ രോമം പലപ്പോഴും കാർഷിക ഉപോത്പന്നമായി തള്ളിക്കളയാറാണു പതിവ്.
ചികിത്സാരംഗത്തെ ആവശ്യങ്ങൾക്കായി ആടിന്‍റെ രോമം മാറ്റിയെടുക്കുന്നതു പാഴായിപ്പോകുന്നതു തടയാനും കഴിയും. ഇപ്പോൾ അസ്ഥി, ദന്ത ചികിത്സാ ആവശ്യങ്ങൾക്കായി കൊളാജൻ വ്യാപകമായി ഉപയോഗിക്കുന്നുണ്ട്.എന്നാൽ, അവ താരതമ്യേന ബലഹീനവും എളുപ്പം ദ്രവിച്ചുപോകുമെന്നതുമാണ്. തന്നെയുമല്ല, നിർമാണചെലവും കൂടുതലുമാണ്. ഇതിനു പുതിയ കണ്ടെത്തൽ നിർണായകമാകും. ഭാവിയിൽ ചിത്സാരംഗത്തു വിപ്ലവകരമായ മാറ്റങ്ങൾ കൊണ്ടുവരാൻ പുതിയ കണ്ടെത്തലിനു കഴിയുമെന്നു ഗവേഷകർ അഭിപ്രായപ്പെടുന്നു.
അതേസമയം, കെരാറ്റിൻ ഉപയോഗിക്കുന്നതുമായി ബന്ധപ്പെട്ട പഠനം മൃഗങ്ങളിൽ പരീക്ഷണഘട്ടത്തിലാണുള്ളത്. ഇതു മനുഷ്യരിൽ പ്രയോഗിക്കാൻ ഇനിയും കാലതാമസമുണ്ടാകും. സുരക്ഷിതത്വം, കാര്യക്ഷമത തുടങ്ങിയവ ഉറപ്പാക്കാൻ തുടർപഠനങ്ങൾ അനിവാര്യമാണെന്നും ഗവേഷകർ വ്യക്തമാക്കുന്നു.
