വണ്ടിപ്പെരിയാർ: വണ്ടിപ്പെരിയാർ അയ്യപ്പൻകോവിൽ സ്വദേശി തെക്കേ പ്ലാപ്പള്ളിയിൽ ശ്രീദേവി ജീവനൊടുക്കിയ കേസിൽ യുവാവിനെ ആത്മഹത്യാ പ്രേരണാക്കുറ്റത്തിന് പോലീസ് അറസ്റ്റു ചെയ്തു.
അയ്യപ്പൻകോവിൽ മനിലപുതുപ്പറമ്പിൽ വീട്ടിൽ പ്രമോദ് വർഗീസി(48 )നെയാണ് അറസ്റ്റ് ചെയ്തത്. കഴിഞ്ഞ ജൂലൈ ഒന്നിനാണ് വീട്ടമ്മ ആത്മഹത്യ ചെയ്തത്.
വണ്ടിപ്പെരിയാർ പോലീസ് അസ്വാഭാവിക മരണത്തിന് കേസ് രജിസ്റ്റർ ചെയ്ത് അന്വേഷണം നടത്തിവരികയായിരുന്നു. അയ്യപ്പൻകോവിൽ സ്വദേശികളായ പ്രമോദ്, ഇയാളുടെ ഭാര്യ സ്മിത എന്നിവരുടെ മാനസിക പീഡനത്താലാണ് ആത്മഹത്യ ചെയ്യുന്നതെന്ന ശ്രീദേവിയുടെ ആത്മഹത്യാക്കുറിപ്പ് പോലീസിനു ലഭിച്ചിരുന്നു.
ഇതേത്തുടർന്നാണ് ആത്മഹത്യാ പ്രേരണ കുറ്റം ചുമത്തി പ്രമോദ് വർഗീസിനെ വണ്ടിപ്പെരിയാർ പോലീസ് അറസ്റ്റ് ചെയ്തത്. പ്രതിയെ പീരുമേട് കോടതിയിൽ ഹാജരാക്കി. റിമാൻഡ് ചെയ്തു.
ഇയാളുടെ ഭാര്യ സ്മിത വിദേശത്തായതിനാൽ നടപടിക്രമങ്ങൾ പൂർത്തീകരിക്കുന്ന മുറയ്ക്ക് ഇവരെയും അറസ്റ്റ് ചെയ്യുമെന്ന് പോലീസ് അറിയിച്ചു.
വണ്ടിപ്പെരിയാർ സർക്കിൾ ഇൻസ്പെക്ടർ കെ. ഹേമന്ത്കുമാറിന്‍റെ നേതൃത്വത്തിൽ എഎസ്ഐ മുഹമ്മദ് ഇസ്മായിൽ, സിപിഒമാരായ ബിനു കുമാർ, രജീഷ് എന്നിവരടങ്ങുന്ന സംഘം നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.
