കുളിമുറിയിൽ കയറിയ വീട്ടുകാരൻ കണ്ടത് ഭീമൻ മലമ്പാമ്പിനെ! മധ്യപ്രദേശിലെ മോഹ്ഗാവിലാണ് വീട്ടുകാരെയും നാട്ടുകാരെയും ഭീതിയിലാഴ്ത്തി 10 അടി നീളമുള്ള മലമ്പാമ്പ് കുളിമുറിക്കുള്ളിൽ ചുരുണ്ടുകൂടിയത്.
വീട്ടിലൊരാൾ കുളിക്കാനായി കുളിമുറിയുടെ വാതിൽ തുറന്നപ്പോഴാണ് കൂറ്റൻ പാമ്പിനെ കണ്ടത്. ഉടൻ തന്നെ പുറത്തിറങ്ങി വാതിൽ പുറത്തുനിന്ന് പൂട്ടി കുടുംബാംഗങ്ങൾ രക്ഷപ്പെടുകയായിരുന്നു. തുടർന്ന് ഇവർ പ്രവീൺ തിവാരി എന്ന പാമ്പ് പിടിത്തക്കാരനെ വിവരമറിയിച്ചു.
സ്ഥലത്തെത്തിയ പ്രവീൺ തിവാരി ഏറെ സാഹസികമായാണ് പാമ്പിനെ കുളിമുറിക്കുള്ളിൽ നിന്ന് പുറത്തെടുത്തത്. വീതി കുറഞ്ഞ സ്ഥലമായതിനാൽ തന്നെ പാമ്പിന് പ്രകോപനമുണ്ടാകാത്ത രീതിയിൽ വളരെ ശ്രദ്ധയോടെയായിരുന്നു രക്ഷാപ്രവർത്തനം. മണിക്കൂറുകൾ നീണ്ട പരിശ്രമത്തിനൊടുവിൽ പാമ്പിനെ സുരക്ഷിതമായി പിടി കൂടി പുറത്തെത്തിച്ചതോടെയാണ് വീട്ടുകാർക്കും നാട്ടുകാർക്കും ശ്വാസം നേരെ വീണത്.
