ജയ്പുർ: പെണ്‍മക്കൾക്ക് ഒന്നരക്കോടി രൂപ സ്ത്രീധനം നൽകിയ ചായക്കടക്കാരൻ ആദായനികുതി വകുപ്പിന്‍റെ നിരീക്ഷണത്തിൽ. രാജസ്ഥാനിലെ കോത്പുട്ലിക്കു സമീപം ഹദ്വാതാ സ്വദേശിയായ ലീല രാം ഗുജ്ജറിനു നേർക്കാണ് അന്വേഷണം.
ഈ മാസം നാലിനായിരുന്നു ഇയാളുടെ മക്കളുടെ വിവാഹം. വിവാഹത്തിനിടെ ഇയാൾ നോട്ട് കെട്ടുകൾ കൂട്ടിയിട്ട് ഉച്ചത്തിൽ എണ്ണുന്നതിന്റെ വീഡിയോ സമൂഹമാധ്യമങ്ങളിൽ വൈറലായിരുന്നു. ഗ്രാമമുഖ്യൻമാരും സമുദായ നേതാക്കും നോക്കിനിൽക്കെയായിരുന്നു നോട്ടെണ്ണൽ. നോട്ടുകൾ എണ്ണിയതിനുശേഷം വരൻമാരുടെ ബന്ധുക്കൾക്കു കെട്ടുകളായി കൈമാറുന്നതും വീഡിയോ ദൃശ്യങ്ങളിൽനിന്നു വ്യക്തമാണ്.
ഇതേതുടർന്ന് ബുധനാഴ്ച ഗുജ്ജറിന് ആദായനികുതി വകുപ്പ് കാരണംകാണിക്കൽ നോട്ടീസ് നൽകി. എന്നാൽ പണത്തിന്‍റെ ഉറവിടത്തെ സംബന്ധിച്ച് വ്യക്തമായ രേഖകൾ നൽകാൻ ഇയാൾക്കു കഴിഞ്ഞില്ല.
കൂടാതെ, പ്രായപൂർത്തിയാകാത്തെ നാലു പെണ്‍മക്കളെ വിവാഹം ചെയ്തു നൽകിയതിനും ഗുജ്ജർക്കെതിരേ അന്വേഷണം നടക്കുന്നുണ്ട്. വിവാഹക്ഷണക്കത്തിൽ രണ്ടു മക്കളുടെ വിവാഹമെന്നാണ് രേഖപ്പെടുത്തിയിരുന്നതെങ്കിലും ആറു പെണ്‍മക്കളുടെ വിവാഹം നടത്തുകയായിരുന്നു. സംഭവം വിവാദമായതോടെ ഒളിവിൽപോയ ഗുജ്ജർക്കും കുടുംബത്തിനുംവേണ്ടി പോലീസ് തെരച്ചിൽ നടത്തുന്നുണ്ട്.
