Day: September 25, 2023

തിരുവനന്തപുരം മെഡിക്കൽ കോളജ് ഐ.സി.യു, വെന്‍റിലേറ്റർ ഫീസ് വർധിപ്പിച്ചു. ഐസിയുവിന് 500 രൂപയും വെന്‍റിലേറ്ററിന് 1000 രൂപയുമാണ് പുതുക്കിയ ഫീസ്. ബിപിഎൽ വിഭാഗക്കാർ ഒഴികെയുള്ളവർ ഫീസ് അടയ്ക്കണം.  ഹോസ്‌പിറ്റൽ ഡവലപ്മെന്റ് സൊസൈറ്റിയാണ് നിരക്ക് വർദ്ധിപ്പിച്ചത്. കഴിഞ്ഞമാസം ചേർന്ന എച്ച്.ഡി.സി എക്സിക്യൂട്ടീവ് കമ്മിറ്റിയാണ് നിരക്ക് വർദ്ധിപ്പിക്കണമെന്ന് തീരുമാനിച്ചത്. നിരക്ക് വർധിപ്പിച്ചതു സംബന്ധിച്ച്  ആശുപത്രി സൂപ്രണ്ട്  ഡോ.നിസാറുദ്ദീൻ വകുപ്പ് മേധാവികൾക്ക്  സർക്കുലർ ആയച്ചു.  കൊവിഡിന് മുമ്പ് ഐസിയുവിന് 330 രൂപയും വെന്‍റിലേറ്ററിന് 660 രൂപയായിരുന്നു ഫീസ്. രോഗി വെന്‍റിലേറ്ററിലാണെങ്കിൽ 1500 രൂപ അടയ്ക്കണം. ഐസിയുവിൽ മാത്രമാണെങ്കിൽ 500 രൂപ അടക്കണം. 

കോൺഗ്രസ് എം പി രാഹുൽ ഗാന്ധിയെ വെല്ലുവിളിച്ച് ഓൾ ഇന്ത്യ മജ്‌ലിസ്-ഇ-ഇത്തേഹാദുൽ മുസ്ലിമീൻ (എഐഎംഐഎം) അധ്യക്ഷൻ അസദുദ്ദീൻ ഒവൈസി.  വരുന്ന ലോക്സഭാ തിരഞ്ഞെടുപ്പിൽ വയനാട്ടിൽ നിന്നല്ല പകരം ഹൈദരാബാദിൽ നിന്ന് മത്സരിക്കാമോയെന്നും, വലിയ പ്രസ്താവനകൾ നടത്താതെ ഹൈദരാബാദിൽ  ഇറങ്ങി തനിക്കെതിരെ മത്സരിക്കാമോയെന്ന് വെല്ലുവിളിച്ച് അസദുദ്ദീൻ ഒവൈസി. ഹൈദരാബാദിൽ ഒരു പൊതുസമ്മേളനത്തെ അഭിസംബോധന ചെയ്ത് സംസാരിക്കുന്നതിനിടെയാണ് ഒവൈസിയുടെ വെല്ലുവിളി പ്രസ്താവന. ‘നിങ്ങളുടെ നേതാവ് രാഹുൽ ഗാന്ധിയെ വരുന്ന ലോക്സഭാ തിരഞ്ഞെടുപ്പിൽ വയനാട്ടിൽ മത്സരിക്കാതെ ഈ ഹൈദരാബാദ് മണ്ഡലത്തിൽ നിന്ന് മത്സരിക്കാൻ ഞാൻ വെല്ലുവിളിക്കുകയാണ്. നിങ്ങൾ വലിയ വലിയ പ്രസ്താവനകൾ ആണല്ലോ നടത്തുന്നത്? എങ്കിൽ ഈ മൈതാനത്തിൽ വരൂ, എനിക്കെതിരെ മത്സരിക്കൂ’എന്ന് ഒവൈസി പറഞ്ഞു.

മല്ലു ട്രാവലർ എന്നറിയപ്പെടുന്ന യൂട്യൂബർ ഷാക്കിറിനെതിരെ ലുക്ക് ഔട്ട് സര്‍ക്കുലര്‍. ഇയാൾക്കെതിരെ പീഡനശ്രമത്തിനു  സൗദി യുവതി പരാതി നൽകിയിരുന്നു. അഭിമുഖത്തിനായി എറണാകുളത്തെ ഹോട്ടലിലേക്ക് ക്ഷണിക്കുകയും എന്നാൽ ഹോട്ടലിലെത്തിയപ്പോൾ ഇയാൾ യുവതിയോട് അപമര്യാദയായി പെരുമാറിയെന്ന് കാണിച്ചാണ് യുവതിയുടെ പരാതി. രണ്ടാഴ്ച മുന്‍പാണ് സംഭവം നടന്നത്. പരാതി നൽകിയിട്ടും  ഷാക്കിര്‍  വിദേശത്ത് തുടരുന്ന സാഹചര്യത്തിലാണ് പൊലീസ് ലുക്ക് ഔട്ട് സര്‍ക്കുലര്‍ ഇറക്കിയത്. ഷാക്കിര്‍ ഉടന്‍ ചോദ്യം ചെയ്യലിന് ഹാജരാകണമെന്നാണ് പോലീസ് നിര്‍ദേശം. അതേസമയം പരാതി വ്യാജമാണെന്ന് പറഞ്ഞ് ഷാക്കിർ രംഗത്തെത്തിയിരുന്നു. നാട്ടില്‍ തിരിച്ചെത്തിയാലുടന്‍ എല്ലാക്കാര്യങ്ങളും വിശദമാക്കുമെന്നും പറഞ്ഞു. തനിക്കെതിരായ പരാതിയെ മതിയായ തെളിവുകള്‍ കൊണ്ട് നേരിടുമെന്നും ഷാക്കിര്‍ പ്രതികരിച്ചിരുന്നു. എന്നാല്‍ ഷാക്കിറിന്‍റെ ന്യായീകരണങ്ങള്‍ വ്യാജമാണെന്ന് പറഞ്ഞ് പരാതിക്കാരി മറ്റൊരു വിഡിയോ ഇട്ടിരുന്നു. സൗദി യുവതിയുടെ രഹസ്യ മൊഴി എറണാകുളം ജുഡീഷ്യല്‍ മജിസ്‌ട്രേറ്റ് കോടതി രേഖപ്പെടുത്തിയിരുന്നു.