സ്വപ്നങ്ങള്‍ കാണാന്‍ എല്ലാവര്‍ക്കും കഴിയും. എന്നാല്‍, കാണുന്ന സ്വപ്നങ്ങള്‍ യാഥാര്‍ഥ്യമാക്കാന്‍ നിശ്ചയദാര്‍ഡ്യമുള്ളവര്‍ക്ക് മാത്രമേ കഴിയൂ. ഇതിനുള്ള ഉദാഹരണമായി മാറുകയാണ് പയ്യന്നൂര്‍ വെള്ളൂര്‍ പഴയ തെരുവിലെ ടി.വി. പുരുഷോത്തമന്‍ (61) എന്ന തെങ്ങുകയറ്റ തൊഴിലാളി.
തെങ്ങിന് മുകളിലിരിക്കുമ്പോള്‍ തലയ്ക്കു മുകളിലൂടെ പോകുന്ന വിമാനങ്ങളും അതില്‍നിന്നുള്ള കാഴ്ചകളുമായിരുന്നു ഒരുകാലത്ത് ഇയാളുടെ സ്വപ്‌നങ്ങളില്‍ നിറഞ്ഞു നിന്നിരുന്നത്. വലിയ ഇരമ്പലോടെ അകന്നുപോകുന്ന വിമാനങ്ങള്‍ ഊണിലും ഉറക്കത്തിലുമെല്ലാം ഇയാള്‍ക്കൊപ്പമുണ്ടായിരുന്നു.
പിന്നീട്, ഇതിനായി നടത്തിയ കഠിനാധ്വാനങ്ങളിലൂടെ തന്‍റെ സ്വപ്നങ്ങള്‍ പൂവണിയിക്കാന്‍ കഴിഞ്ഞതിന്‍റെ സന്തോഷത്തിലാണിന്ന് പുരുഷു എന്ന് വിളിക്കപ്പെടുന്ന പുരുഷോത്തമന്‍.
നെയ്ത്ത് കുലത്തൊഴിലാക്കിയ കുടുംബത്തിലെ മൂത്ത മകനായിരുന്നു പുരുഷു. മൂന്നാം ക്ലാസില്‍ വിദ്യാഭ്യാസം അവസാനിപ്പിക്കേണ്ടിവന്ന പുരുഷുവിന് വിധിയേല്‍പ്പിച്ച പ്രഹരമാണ് തെങ്ങിലും മരത്തിലുമൊക്കെ കയറാന്‍ പഠിക്കാനിടയാക്കിയത്.
അച്ഛന്‍ അമ്മയെ ഉപേക്ഷിച്ച് പോയതോടെ മൂന്നുമക്കളും അമ്മയുമടങ്ങുന്ന ഇവരുടെ കുടുംബം നടുക്കടലില്‍പ്പെട്ട അവസ്ഥയിലായി. അമ്മയ്ക്ക് നെയ്ത്തിലൂടെ കിട്ടുന്ന തുച്ഛമായ വരുമാനം നിത്യനിദാന ചെലവുകള്‍ക്ക് തികയാതെ വന്നപ്പോള്‍ കുടുംബം പോറ്റാനായി തെങ്ങുകയറാനുള്ള തള കാലിലണിയുകയായിരുന്നു പുരുഷു.
കൂട്ടത്തില്‍ മത്സ്യക്കച്ചവടവും നടത്തി. പയ്യന്നൂരില്‍ അന്നുണ്ടായിരുന്ന മദ്രാസ് ഹോട്ടലിനോടു ചേര്‍ന്നുള്ള സ്റ്റാളിലെ കച്ചവടക്കാരനുമായി. ഇതൊക്കെ ചെയ്യുമ്പോഴും തെങ്ങുകയറ്റമായിരുന്നു പ്രധാന തൊഴില്‍.
ജീവിതത്തില്‍ ആധ്യാത്മികതക്ക് പ്രഥമസ്ഥാനം നല്‍കിയ പുരുഷു ശബരിമലയും ഗുരുവായൂരുമുള്‍പ്പെടെയുള്ള ക്ഷേത്രദര്‍ശനങ്ങള്‍ പതിവാക്കിയിരുന്നു. ആധ്യാത്മിക സംഘടനകളായ ശിവശക്തിയുള്‍പ്പെടെയുള്ള മൂന്നു ഗ്രൂപ്പുകളിലെ സജീവ പ്രവര്‍ത്തകനായിരുന്നു പുരുഷു.
പയ്യന്നൂര്‍ സുബ്രഹ്മണ്യ സേവാ സമിതി പ്രവര്‍ത്തകര്‍ക്കൊപ്പമായിരുന്നു ഉത്തരേന്ത്യയിലെ പ്രധാന ക്ഷേത്രങ്ങളിലെല്ലാം സഞ്ചാരപ്രിയനായ പുരുഷുവെത്തിയത്. ജോലിയില്ലാത്ത ദിവസങ്ങളുടെ കൂട്ടത്തില്‍ രണ്ടുമൂന്നു ദിവസങ്ങള്‍കൂടി ഉള്‍പ്പെടുത്തി ദീര്‍ഘദൂര ട്രെയിന്‍ യാത്രയും ഇദ്ദേഹത്തിന്‍റെ പതിവായിരുന്നു.
ഇതിനിടയിലാണ് നീലേശ്വരം മടിക്കൈ സ്വദേശിനിയും ദിനേശ് ബീഡി തൊഴിലാളിയുമായ സരോജിനി ജീവിത സഖിയായത്. ഇവരുടെ ദാമ്പത്യത്തിലുണ്ടായ ഹരികൃഷ്ണനും കൃഷ്ണവേണിക്കും മികച്ച വിദ്യാഭ്യാസം നല്‍കുന്നതിനും ഒരു കുറവും വരുത്തിയില്ല. ഇപ്പോള്‍ ബാംഗളൂരുവില്‍ മെക്കാനിക്കല്‍ എൻജിനിയറാണ് മകന്‍ ഹരികൃഷ്ണന്‍. ഇലക്‌ട്രോണിക്സ് എംഎസ്‌സി ബിരുദധാരിയാണ് മകള്‍ കൃഷ്ണവേണി.
ഇതിനിടയിലും പുരുഷു തന്‍റെ സ്വപ്‌നങ്ങളുടെ ചിറകുകളില്‍ വിമാനങ്ങള്‍ക്കൊപ്പം മാനംമുട്ടെ പറക്കുകയായിരുന്നു. സ്വപ്‌നസാഫല്യത്തിനായി കൂടുതല്‍ പണം വേണമെന്ന തിരിച്ചറിവ് ഇയാളെ കഠിനാധ്വാനിയാക്കി. കൂടുതല്‍ അധ്വാനമാവശ്യമായ തെങ്ങുകയറ്റം തൊഴിലാക്കിയവര്‍ രാവിലെ മുതല്‍ ഒന്പത്, പത്താകുമ്പോഴേക്കും ജോലി മതിയാക്കി വിശ്രമത്തിലേര്‍പ്പെടുകയാണ് പതിവ്.
എന്നാല്‍, രാവിലെ മുതല്‍ വൈകുന്നേരം വരെ തന്‍റെ തൊഴിലില്‍ മുഴുകിയതോടെയാണ് വീട്ടുചെലവുകള്‍ കഴിച്ച് യാത്രകള്‍ക്കുള്ള പണമുണ്ടാക്കാന്‍ കഴിഞ്ഞത്. കൂടാതെ വിവിധയിടങ്ങളിലായി പാട്ടത്തിന് എടുത്ത അഞ്ച് തെങ്ങ് തോപ്പുകളില്‍നിന്നും വിവാഹങ്ങള്‍ക്കാവശ്യമായ തെങ്ങിന് പൂക്കുലയും ഇളനീര്‍, തേങ്ങ എന്നിവയും വില്ക്കുന്നതിലൂടെ ലഭിക്കുന്ന വരുമാനവും കൂടിയായപ്പോള്‍ സാമ്പത്തിക പരാധീനതകള്‍ മറികടക്കാനായി.
ആഗ്രഹങ്ങള്‍ മനസിനുള്ളില്‍ ചുരമാന്തിക്കൊണ്ടിരിക്കെയാണ് പ്രവാസിയും ടൂര്‍ പ്രോഗ്രാം എജന്‍സി നടത്തിപ്പുകാരനുമായ പയ്യന്നൂര്‍ സുബ്രഹ്മണ്യ സ്വാമി ക്ഷേത്രത്തിന് സമീപത്തെ പ്രവീണ്‍ എന്ന പ്രജിത്ത്കുമാറിനെ പരിചയപ്പെടാനിടയായത്. മാനംമുട്ടെയുള്ള ആഗ്രഹങ്ങള്‍ പങ്കുവച്ചപ്പോള്‍ കാര്യമായ അക്ഷരജ്ഞാനവും ഭാഷകളുമറിയാത്ത പുരുഷുവിനെ യാത്രകളില്‍ ഉള്‍പ്പെടുത്തുന്നതിന് പ്രവീണ്‍ തയാറാകുകയായിരുന്നു.
ഇതായിരുന്നു ആകാശ യാത്രകളുടെ തുടക്കം. ഓരോ രാജ്യത്തിന്‍റെ പ്രത്യേകതകളും സംസ്‌കാരങ്ങളും കൗതുകങ്ങളും പ്രവീണിന്‍റെ വിശദീകരണത്തിലൂടെയാണ് പുരുഷു മനസിലാക്കിയത്. നാട്ടിലെ സംഘടനകളും മറ്റും നടത്തുന്ന ചിട്ടികളില്‍ ചേര്‍ന്നാണ് യാത്രക്കുള്ള ഒരുക്കങ്ങള്‍ തുടങ്ങുന്നത്.
യാത്രയുടെ സമയമാകുമ്പോള്‍ ചിട്ടി വിളിച്ചെടുക്കുകയാണ് പതിവ്. ബീഡിത്തൊഴിലാളിയായ ഭാര്യ സരോജിനിയെക്കൂട്ടിയായിരുന്ന ഗള്‍ഫ് യാത്ര. ദുബായ്, അബുദാബി എന്നിവിടങ്ങളിലേക്കായിരുന്നു ഭാര്യയുമൊത്തുള്ള യാത്ര.
തുടര്‍ന്നുള്ള യാത്രകള്‍ക്ക് ഭാര്യ മടികാണിച്ചതിനാല്‍ കൂടെ കൂട്ടിയില്ല. എങ്കിലും ഭാര്യയും മക്കളും നല്‍കുന്ന പ്രോത്സാഹനമായിരുന്നു പുരുഷുവിന്‍റെ ഊര്‍ജം. സിംഗപ്പൂര്‍, മലേഷ്യ എന്നിവിടങ്ങള്‍ സന്ദര്‍ശിച്ച പുരുഷു ഡിസംബര്‍ നാലിന് വിയറ്റ്‌നാം സന്ദര്‍ശിക്കാനുള്ള ഒരുക്കങ്ങളെല്ലാം പ്രവീണിന്‍റെ സഹായത്തോടെ പൂര്‍ത്തീകരിച്ചുകഴിഞ്ഞു.
അതുകഴിഞ്ഞ് ഫ്രാന്‍സ്, ഇറ്റലി, അമേരിക്ക എന്നീ രാജ്യങ്ങള്‍ സഞ്ചരിക്കാനുള്ള ആഗ്രഹമാണ് ഈ തെങ്ങുകയറ്റ തൊഴിലാളിക്കുള്ളത്. ഈ ആഗ്രഹങ്ങള്‍ സാധിക്കുമെന്ന് വിളിച്ചോതുന്നതാണ് ഇരുകാലുകളിലും രൂപപ്പെട്ടിരിക്കുന്ന കട്ടിത്തഴമ്പ്.
എല്ലാവരുടെയും സ്വപ്‌നമായ സര്‍ക്കാര്‍ ജോലിയുള്ളവര്‍ക്കുപോലും നേടിയെടുക്കാന്‍ കഴിയാത്ത നേട്ടങ്ങളാണ് തന്‍റെ കഠിനാധ്വാനത്തിലൂടെ ഈ തെങ്ങുകയറ്റ തൊഴിലാളി നേടിയെടുത്തത്. അതിനിടയാക്കിയത് ഉയരമുള്ള തെങ്ങിന് മുകളില്‍നിന്നും മാനംമുട്ടെയുയര്‍ന്ന ആഗ്രഹങ്ങള്‍ക്ക് പിന്നാലെയുള്ള സഞ്ചാരമാണ്.
പീറ്റര്‍ ഏഴിമല
