കൊല്ലം: വിൽപ്പനയ്ക്കായി എത്തിച്ച എംഡിഎംഎയുമായി രണ്ട് യുവാക്കൾ അറസ്റ്റിൽ. ഇരവിപുരം പുത്തൻചന്ത റെയിൽവേഗേറ്റിന് സമീപം പുളിയറതെക്കതിൽ ഷാരുഖ് ഖാൻ (27), വടക്കേവിള പട്ടത്താനം ജി.വി നഗർ-53 കാവുങ്ങൽ തെക്കതിൽ റെനീഫ്(23) എന്നിവരാണ് ഇരവിപുരം പോലീസിന്റെ പിടിയിലായത്.
ക്രിസ്മസ് പുതുവത്സരാഘോഷ രാവുകൾ ലഹരി മുക്തമാക്കുന്നതിന്റെ ഭാഗമായി പോലീസ് നടത്തിയ പരിശോധനയിലാണ് പുത്തൻചന്ത റെയിൽവേഗേറ്റിന് സമീപത്തുനിന്നു 4.24 ഗ്രാം എംഡിഎംഎ യുമായി ഇവർ പിടിയിലായത്.
പ്രതികൾ ലഹരിമരുന്ന് കടത്തിക്കൊണ്ടുവന്ന് യുവാക്കൾക്ക് വിതരണം ചെയ്യുന്നതായി ലഭിച്ച രഹസ്യ വിവരത്തിന്റെ അടിസ്ഥാനത്തിൽ ഇവർ പോലീസ് നിരീക്ഷണത്തിലായിരുന്നു. കഴിഞ്ഞ ദിവസം രാത്രി ഇരവിപുരം പോലീസ് നടത്തിയ പരിശോധനയിൽ ഇവരിൽനിന്ന് എംഡിഎംഎയും ലഹരിമരുന്ന് വിൽപ്പന നടത്തിയ പണവും കണ്ടെടുക്കുകയായിരുന്നു.
കൊല്ലം എസിപി ഷെരീഫിന്റെ നിർദേശപ്രകാരം ഇരവിപുരം ഇൻസ്പെക്ടർ രാജീവിന്റെ നേതൃത്വത്തിൽ എസ്.ഐമാരായ രഞ്ജിത്ത്, നൗഷാദ്, സിപിഒ മാരായ അനീഷ്, സജിൻ, ഷാൻ, ഷംനാദ് എന്നിവർ ചേർന്നാണ് പ്രതികളെ അറസ്റ്റ് ചെയ്തത്. ഇവരെ കോടതിയിൽ ഹാജരാക്കി റിമാൻഡ് ചെയ്തു.
