പ്രിയ കലാകാരൻ കലാഭവൻ മണിയുടെ അൻപത്തിയഞ്ചാം പിറന്നാൾ ആയിരുന്നു ഈ പുതു വർഷത്തിൽ. നടൻ ടിനി ടോം കലാഭവൻ മണിയെ ഓർമിച്ചുകൊണ്ട് പങ്കുവച്ച പോസ്റ്റ് ആണിപ്പോൾ സോഷ്യൽ മീഡിയയിൽ വൈറലാകുന്നത്. ഒന്നുമല്ലാതിരുന്ന കാലത്ത് തനിക്കൊപ്പം നിന്നയാളാണ് കലാഭവൻ മണി എന്നാണ് ടിനി പറഞ്ഞത്.
ടിനിയുടെ കുറിപ്പിന്റെ പൂർണ രൂപം…
ജനുവരി ഒന്നിനാണ് മണിച്ചേട്ടന്റെ ജന്മദിനം. എനിക്ക് 19 വയസുള്ളപ്പോളാണ് എന്റെ സ്വപ്ന തുല്യമായ ആദ്യ വിദേശ വിമാനയാത്ര, ഗൾഫിലേക്ക്. സെഞ്ച്വറി മമ്മിക്കയും സിദ്ധിക്കയും നാദിർഷിക്കയും നയിക്കുന്ന ആ ഷോയിൽ സിനിമയിൽ മുഖം കാണിക്കാത്തവരായി ഞാനും മണിച്ചേട്ടനും മാത്രം. പലപ്പോഴും ഒരുമിച്ച് ഒരുമുറിയിൽ ഒരു കട്ടിലിൽ.
പ്രധാനപ്പെട്ടവരെ സത്കരിക്കാനും പുറത്തു കറക്കാനും പ്രവാസികൾ ക്യൂ നിൽക്കുമ്പോൾ ഞങ്ങൾ പലപ്പോഴും ഏകാന്തതയിൽ ആയിരുന്നു. മണിച്ചേട്ടന് പരിചയമുള്ള ആരെങ്കിലുമൊക്കെ വരുമ്പോൾ ഒറ്റയ്ക്കാകുന്ന എന്നെയും കൂട്ടുമായിരുന്നു.
അവർ മേടിച്ചു കൊടുക്കുന്ന ഗൾഫ് മുണ്ടും ഈന്തപ്പഴവും വാച്ചും വെൽവെറ്റ് പുതപ്പും ചേട്ടൻ എനിക്കും പങ്കുവെയ്ക്കുമായിരിന്നു. ഒന്നുമില്ലായ്മയിൽ മണിച്ചേട്ടൻ എനിക്ക് അന്ന് പങ്കുവച്ച സമ്മാനങ്ങളാണ് ജീവിതത്തിൽ ഏറ്റവും വിലപിടിപ്പുള്ളത്. ഹാപ്പി ബർത്ത് ഡേ മണിച്ചേട്ടാ. -ടിനി ടോം
