ന്യൂഡൽഹി: ഇറാനെതിരായ സൈനികനീക്കങ്ങൾക്കായി അമേരിക്ക ഇന്ത്യൻ നാവിക താവളങ്ങളും തുറമുഖങ്ങളും ഉപയോഗിക്കുന്നുവെന്ന പ്രചാരണം ഇന്ത്യ ശക്തമായി നിഷേധിച്ചു. മുൻ യുഎസ് ആർമി കേണൽ ഡഗ്ലസ് മാക്ഗ്രെഗർ അമേരിക്കൻ മാധ്യമത്തിനു നൽകിയ അഭിമുഖത്തിൽ ഉന്നയിച്ച വാദങ്ങളാണ് കേന്ദ്രം തള്ളിയത്. അടിസ്ഥാനരഹിതവും കെട്ടിച്ചമച്ചതുമായ പ്രസ്താവനകളാണിതെന്ന് വിദേശകാര്യമന്ത്രാലയം എക്സിൽ അറിയിച്ചു. ഇത്തരത്തിലുള്ള പ്രസ്താവനകൾക്കെതരേ ജാഗ്രത പാലിക്കണമെന്നും മന്ത്രാലയം.
അമേരിക്കയുടെ പശ്ചിമേഷ്യൻ താവളങ്ങളും തുറമുഖങ്ങളും തകർക്കപ്പെട്ടതായും, അതിനാൽ യുഎസ് നേവിക്ക് ഇന്ത്യൻ തുറമുഖങ്ങളെ ആശ്രയിക്കേണ്ടി വരുന്നുവെന്നുമാണ് ഡഗ്ലസ് മാക്ഗ്രെഗർ പറഞ്ഞത്. എന്നാൽ ഈ വാദത്തിൽ കഴന്പില്ലെന്ന് ഇന്ത്യ വ്യക്തമാക്കി.
