മോഹൻലാൽ, സിബി മലയിൽ , ലോഹിതദാസ് കൂട്ടുകെട്ടിൽ പിറന്ന കിരീടം 37 വർഷങ്ങൾക്ക് ശേഷം ഫോർകെ ദൃശ്യഭംഗിയിൽ റീ റിലീസിന്. മോഹൻലാലിന്റെ പിറന്നാളിനോടനുബന്ധിച്ച് ആശംസ നേർന്ന് ഔദ്യോഗിക പോസ്റ്റർ അണിയറ പ്രവർത്തകർ പുറത്തിറക്കി .
ദേശീയ ചലച്ചിത്ര വികസന കോർപ്പറേഷനുമായി സഹകരിച്ച് സെവൻ ആർട്സ് ഇന്റർനാഷണൽ ലിമിറ്റഡ് അവതരിപ്പിക്കുന്ന ചിത്രം ജൂൺ മാസത്തിൽ പ്രദർശനത്തിന് എത്തും. കൃപാ ഫിലിംസിന്റെ ബാനറിൽ എൻ.കൃഷ്ണകുമാറും (കിരീടം ഉണ്ണി) ദിനേശ് പണിക്കരും ചേർന്നാണ് നിർമിച്ചത്. മോഹൻലാൽ എന്ന നടനെ അതുവരെ കാണാത്ത തലത്തിലേക്ക് ഉയർത്തിയ ചിത്രം ആണ് കീരീടം.
മലയാളത്തിന്റെ എക്കാലത്തെയും ക്ലാസിക് വീണ്ടും സ്ക്രീനിൽ എത്തുമ്പോൾ അകാലത്തിൽ പൊലിഞ്ഞ തിലകൻ, മാമുക്കോയ, ഒടുവിൽ ഉണ്ണിക്കൃഷ്ണൻ, മുരളി, കൊച്ചിൻ ഹനീഫ, തിക്കുറിശ്ശി, കവിയൂർ പൊന്നമ്മ, ഫിലോമിന, ശ്രീനാഥ്, മോഹൻരാജ് (കീരിക്കാടൻ ജോസ്), ജോണി, കനകലത തുടങ്ങിയവരെ ഒരിക്കൽ കൂടി കാണാൻ സാധിക്കുന്നതിൽ സന്തോഷവും, ഒപ്പം മനസിൽ നോവും സമ്മാനിക്കും .ജഗതി ശ്രീകുമാർ, ജഗദീഷ്, പാർവതി, മണിയൻപിള്ള രാജു, ഉഷ, യദു കൃഷ്ണൻ, കൊല്ലം തുളസി, പൂജപ്പുര രാധാകൃഷ്ണൻ തുടങ്ങിയവരാണ് മറ്റ് താരങ്ങൾ എസ്. കുമാറിന്റെ ഛായാഗ്രഹണവും കൈതപ്രത്തിന്റെ ഗാനങ്ങളും ജോൺസണിന്റെ സംഗീതവും മികവേകി. ഹൈസിൻ ഗ്ലോബൽ വെഞ്ചേഴ്സ് ആണ് വിതരണം. ഫോർ കെ റീമാസ്റ്ററിങ്: ഹൈ സ്റ്റുഡിയോസ്, പിആർഒ: പി.ശിവപ്രസാദ്.
