ഇന്ത്യയുടെ ഭൂപ്രകൃതിയിൽ ആകൃഷ്ടരായി ധാരാളം വിദേശികൾ ഇങ്ങോട്ടേക്ക് ദിവസേന എത്താറുണ്ട്. അവരിൽ പലരും തിരികെപ്പോകാൻ ആഗ്രഹിക്കാറുമില്ല. അത്തരമൊരു വിദേശിയുടെ വാർത്തയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. യുകെ ട്രാവൽ വ്ലോഗർ ഡേവ് ഫ്ലൂ ആണ് വാർത്തയിലെ താരം.
മുംബൈയിലെ സാക്കി നാക്കയിലെ തെരുവുകളിലൂടെ നടക്കുന്നതിനിടയിലാണ് ഡേവ് തന്റെ ദുഖം കാമറയ്ക്ക് മുന്നിൽ പങ്കുവച്ചത്. വർഷങ്ങളായി താൻ അത്രമേൽ സ്നേഹിച്ച, ഹൃദയത്തോട് ചേർത്തുവെച്ച ഒരു രാജ്യത്ത് നിന്നും പോകുന്പോൾ വികാരാധീനനാകാതെ ഇരിക്കാൻ ആകില്ല.
“ഓരോ തവണയും എന്റെ നെഞ്ച് തകരുന്നു.” ലോകത്ത് മറ്റൊരു രാജ്യത്തോടും തോന്നാത്ത അത്രയും വലിയ സ്നേഹവുമാണ് ഇന്ത്യയോടുള്ളത്. അതുകൊണ്ട് തന്നെ ഓരോ തവണ ഇവിടെ നിന്നും മടങ്ങുമ്പോഴും മാനസികമായി ഏറെ തളർന്നുപോകാറുണ്ട്. “ജീവിതം അതിന്റെ വഴിക്ക് മുന്നോട്ട് പോകേണ്ടതുണ്ടെന്ന് എനിക്കറിയാം. എങ്കിലും ഇവിടുന്ന് പോവുകയെന്നത് ഓരോ തവണയും എന്റെ നെഞ്ച് തകർക്കുന്ന കാര്യമാണ്,” എന്ന് വീഡിയോ പങ്കുവച്ചുകൊണ്ട് ഡേവ് പറഞ്ഞു.
