ഡൽഹി മെട്രോ സ്റ്റേഷനിൽ വച്ച് ഇൻഫ്ലുവൻസറായ നിഖിൽ കൊച്ചാർ ചിത്രീകരിച്ച പുതിയ ഇൻസ്റ്റാഗ്രാം റീൽ സമൂഹമാധ്യമങ്ങളിൽ വൈറലാവുകയാണ്. ട്രെയിൻ പ്ലാറ്റ്ഫോമിൽ നിർത്തിയിട്ടിരുന്ന സമയത്ത് ജനലിൽ ഫോൺ ഒട്ടിച്ചുവെച്ച് ‘മൻമാ ഇമോഷൻ ജാഗേ’ എന്ന ഗാനത്തിന് ചുവടുവെക്കുന്നതാണ് വീഡിയോയുടെ തുടക്കം.
തുടർന്ന് മെട്രോ ട്രെയിൻ മുന്നോട്ട് നീങ്ങുമ്പോൾ പ്ലാറ്റ്ഫോമിലൂടെ ഫോണിന് പിന്നാലെ നിഖിൽ ഓടുന്ന ദൃശ്യങ്ങളും, ട്രെയിൻ നീങ്ങുന്നതിനനുസരിച്ച് പുറത്തെ കാഴ്ചകളും വീഡിയോയിൽ കാണാം. 135 മില്യണിലധികം കാഴ്ചക്കാരാണ് ചുരുങ്ങിയ സമയത്തിനുള്ളിൽ ഈ വീഡിയോയ്ക്ക് ലഭിച്ചത്.
എന്നാൽ വീഡിയോ ശ്രദ്ധിച്ചു കണ്ട നെറ്റിസൺസ് ഇതിലെ ചില വൈരുധ്യങ്ങൾ ചൂണ്ടിക്കാട്ടി രംഗത്തെത്തി. ട്രെയിൻ നീങ്ങുമ്പോൾ കാണുന്ന രണ്ടാമത്തെ ദൃശ്യം ഫോൺ പുറത്തുനിന്നല്ല, മറിച്ച് ട്രെയിന്റെ ഉള്ളിൽ നിന്നാണ് ചിത്രീകരിച്ചിരിക്കുന്നതെന്ന് ഗ്ലാസിലെ പ്രതിബിംബവും മങ്ങലും വ്യക്തമാക്കുന്നുണ്ട്.
തുടക്കത്തിൽ ഫോൺ പുറത്ത് ഒട്ടിക്കുന്നത് പോലെ കാണിച്ചതിന് ശേഷം, ട്രെയിൻ എടുക്കുന്നതിന് തൊട്ടുമുമ്പ് ഫോൺ മാറ്റുകയും, ഉള്ളിലിരുന്ന സുഹൃത്ത് ഫോൺ വഴി ചിത്രീകരിച്ച ദൃശ്യങ്ങൾ എഡിറ്റ് ചെയ്ത് ചേർക്കുകയുമായിരുന്നുവെന്നാണ് പ്രേക്ഷകരുടെ കണ്ടെത്തൽ.
എന്തായാലും സ്റ്റണ്ടിനേക്കാൾ ഉപരി വീഡിയോയുടെ എഡിറ്റിംഗ് തന്ത്രവും ക്യാമറ ആംഗിളുകളും ചർച്ചയാക്കിക്കൊണ്ട് ദൃശ്യങ്ങൾ ഇന്റർനെറ്റിൽ തരംഗമായി തുടരുകയാണ്.
