പയ്യന്നൂര്‍: ഓണ്‍ലൈന്‍ തട്ടിപ്പിലൂടെ പയ്യന്നൂര്‍ സ്വദേശിക്ക് നഷ്ടമായത് 14 ലക്ഷം രൂപ. തായിനേരിയിലെ ജോയി തോമസിന്‍റെ പരാതിയിലാണ് നിഷ വര്‍മ്മ, ഉന്മേഷ് ശര്‍മ എന്നിവര്‍ക്കെതിരെ പയ്യന്നൂര്‍ പൊലിസ് കേസെടുത്തത്.
ഒരു പ്രമുഖ ധനകാര്യ സ്ഥാപനത്തില്‍ നിന്ന് വരുന്നവരാണെന്ന് വിശ്വസിപ്പിച്ച് പ്രതികളുടെ വ്യാജ ആപ് ഡൗണ്‍ലോഡ് ചെയ്യിപ്പിച്ചായിരുന്നു തട്ടിപ്പ്. ദിവസവും അഞ്ച് ശതമാനത്തിലധികം ലാഭം കിട്ടുമെന്ന് വിശ്വസിപ്പിക്കുകയായിരുന്നു.
കഴിഞ്ഞ ഓഗസ്റ്റ് 12 മുതല്‍ 21 വരെയുള്ള ദിവസങ്ങളില്‍ നാലുതവണകളായി പരാതിക്കാരന്‍ നിക്ഷേപിച്ച 14 ലക്ഷം രൂപയാണ് പ്രതികള്‍ തട്ടിയെടുത്തത്. വാഗ്ദാനപ്രകാരമുള്ള ലാഭമോ നിക്ഷേപിച്ച പണമോ ലഭിക്കാതെ വന്നപ്പോള്‍ നടത്തിയ അന്വേഷണത്തില്‍ ചതിക്കപ്പെട്ടുവെന്ന് മനസിലായപ്പോഴാണ് പരാതിയുമായി പൊലീസിനെ സമീപിച്ചത്.
