ഓൺലൈൻ ജോലി അഭിമുഖങ്ങളിൽ പുതിയ തലവേദനയായി എഐ ഡീപ്‌ഫേക്ക് സാങ്കേതികവിദ്യ. ഓൺലൈൻ അഭിമുഖത്തിനിടെ ഉദ്യോഗാർഥി മുഖത്ത് ലൈവ് ഫിൽട്ടർ (ഡീപ്‌ഫേക്ക് ഫിൽട്ടർ) ഉപയോഗിക്കുന്നത് സംശയിച്ച അമേരിോക്കൻ റിക്രൂട്ടർ, ഡബ്ല്യുഡബ്ല്യുഇ താരം ജോൺ സീനയുടെ പ്രശസ്തമായ സിഗ്നേച്ചർ മൂവ് ഉപയോഗിച്ച് ഉദ്യോഗാർഥിയെ കുടുക്കിയതിന്‍റെ വീഡിയോ സമൂഹമാധ്യമങ്ങളിൽ വൈറലാകുന്നു.
അമേരിക്കയിലെ മിഷിഗണിൽ നിന്നുള്ള ജേസൺ എന്ന റിക്രൂട്ടറാണ് ഈ വ്യത്യസ്തമായ അനുഭവത്തിന് സാക്ഷിയായത്. അഭിമുഖത്തിനിടയിൽ ഉദ്യോഗാർഥിയുടെ മുഖത്തിന് ചുറ്റും ചില വിചിത്രമായ തകരാറുകൾ ജേസൺ ശ്രദ്ധിച്ചിരുന്നു. തുടർന്ന് ഇതൊരു ലൈവ് ഫേസ് ഫിൽട്ടർ ആണെന്ന് ജേസണും സഹപ്രവർത്തകനും തിരിച്ചറിയുകയായിരുന്നു.
ഉദ്യോഗാർഥിയുടെ മുഖത്തെ ഗ്ലാസുകളിലും കവിൾത്തടങ്ങളിലും കൃത്രിമമായ പാടുകൾ കണ്ടതോടെ ജേസൺ തന്‍റെ സംശയം ഉറപ്പിക്കാൻ ഒരു ചെറിയ പരീക്ഷണം നടത്തി. പ്രശസ്ത ഡബ്ല്യുഡബ്ല്യുഇ താരം ജോൺ സീനയുടെ “യു കാന്‍റ് സീ മീ” (You can’t see me) എന്ന രീതിയിൽ മുഖത്തിന് മുന്നിലൂടെ കൈ വീശാൻ അദ്ദേഹം ഉദ്യോഗാർഥിയോട് ആവശ്യപ്പെട്ടു.
എന്നാൽ മുഖത്തിന് നേരിട്ട് മുന്നിൽ കൈ കാണിക്കുന്നതിന് പകരം, ഉദ്യോഗാർഥി മുഖത്തിന് വശങ്ങളിലായാണ് കൈ വെച്ചത്. ജേസൺ വീണ്ടും ആവശ്യപ്പെട്ടിട്ടും അദ്ദേഹം കൃത്യമായി ആ ആംഗ്യൺ ചെയ്യാൻ തയ്യാറായില്ല. ഉദ്യോഗാർഥിയുടെ ലിങ്ക്ഡ്ഇൻ, ഗിത്‌ഹബ് പ്രൊഫൈലുകളിലെ ചിത്രങ്ങളുമായി അദ്ദേഹത്തിന്‍റെ മുഖത്തിന് വ്യത്യാസമുണ്ടെന്നും ജേസൺ വ്യക്തമാക്കി.
ഈ അപൂർവ്വ അനുഭവം ജേസൺ ‘എക്സ്’ പ്ലാറ്റ്‌ഫോമിൽ പങ്കുവെച്ചതോടെ വീഡിയോ ലക്ഷക്കണക്കിന് ആളുകളാണ് കണ്ടത്. റിമോട്ട് അഭിമുഖങ്ങളിൽ യഥാർഥ ഉദ്യോഗാർത്ഥികളെ തിരിച്ചറിയുന്നത് എങ്ങനെ വലിയൊരു വെല്ലുവിളിയായി മാറുന്നു എന്നാണ് ഈ സംഭവം ചൂണ്ടിക്കാണിക്കുന്നത്. ആർട്ടിഫിഷ്യൽ ഇന്‍റലിജൻസിന്‍റെ കാലത്ത് ഉദ്യോഗാർഥികളുടെ യഥാർഥ വ്യക്തിത്വം ഉറപ്പാക്കാൻ കൂടുതൽ ജാഗ്രത പാലിക്കേണ്ടി വരുമെന്നും, നേരിട്ടുള്ള അഭിമുഖങ്ങളിലേക്ക് കമ്പനികൾക്ക് തിരികെ പോകേണ്ടി വന്നേക്കാമെന്നും റിക്രൂട്ടർമാർ അഭിപ്രായപ്പെടുന്നു.
