അങ്കമാലി ഡയറീസ് എന്ന ചിത്രത്തിലൂടെ വെള്ളിത്തിരയിൽ എത്തിയ നടിയാണ് അന്ന രാജൻ. ഉദ്ഘാടന വേദികളിൽ ഇന്ന് ഏറെ സജീവമാണ് താരം. സോഷ്യൽ മീഡിയയിൽ ഏറെ സജീവമായ അന്നയ്ക്ക് ആരാധകരും ഏറെയാണ്. ഇപ്പോഴിതാ തന്റെയൊരു ഫോട്ടോ അശ്ലീതല നിറച്ച് എഡിറ്റ് ചെയ്തതിനെതിരേ ആഞ്ഞടിച്ചിരിക്കുകയാണ് അന്ന രാജൻ. ഒരു ഇൻസ്റ്റാഗ്രാം അക്കൗണ്ടിൽ ആണ് ഈ ഫോട്ടോ വന്നിരിക്കുന്നത്. അന്നയ്ക്കൊപ്പം വേറെ പല നടിമാരുടേയും ഫോട്ടോകൾ അശ്ലീലത നിറച്ച് ഇതിൽ എഡിറ്റ് ചെയ്തിട്ടിട്ടുണ്ട്.
അശ്ലീലവും അപകീർത്തികരവുമായ രീതിയിൽ ഇത് പോസ്റ്റ് ചെയ്തത് തന്റെ അന്തസിന് കളങ്കമുണ്ടാക്കിയെന്നും നീതി ലഭിക്കും വരെ നിയമപരമായി പോരാടുമെന്നും അന്ന രാജൻ അറിയിച്ചു. ഇതിൽ അടിയന്തര നടപടി സ്വീകരിക്കണമെന്ന് കേരള പോലീസിനോടും സൈബർ പോലീസിനോടും അന്ന അഭ്യർഥിച്ചിട്ടുണ്ട്. വേണ്ട തെളിവുകൾ താന്റെ പക്കലുണ്ടെന്ന് പറഞ്ഞ അന്ന, ഔദ്യോഗികമായി പോലീസ് പരാതിയും നൽകുമെന്നും അറിയിച്ചു.
ഈ ഫോട്ടോ ദുരുദ്ദേശത്തോടെ എഡിറ്റ് ചെയ്ത്, അശ്ലീലവും അപകീർത്തിപരവുമായ രീതിയിൽ പോസ്റ്റ് ചെയ്തത് എന്റെ അന്തസിനെ കളങ്കപ്പെടുത്താനാണ്. ഇത് ലജ്ജാകരവും ഒരിക്കലും അംഗീകരിക്കാനാകാത്തതും എന്റെ സ്വകാര്യതയുടേയും അന്തസിന്റെയും ഗുരുതരമായ ലംഘനവുമാണ്. ഈ അക്കൗണ്ട് ഞാൻ ഇൻസ്റ്റാഗ്രാമിൽ റിപ്പോർട്ട് അടിച്ചിട്ടുണ്ട്. ബന്ധപ്പെട്ട നിയമങ്ങൾ പ്രകാരം പോലീസിൽ പരാതി നൽകും. ഇത്തരത്തിൽ ഫോട്ടോ എഡിറ്റ് ചെയ്ത, പ്രചരിപ്പിച്ച വ്യക്തികൾക്കെതിരേ നിയമനടപടി സ്വീകരിക്കും. നീതി ലഭിക്കുന്നത് വരെ ഞാൻ ഇതിനോട് പോരാടുക തന്നെ ചെയ്യും. ഇത്തരം അധിക്ഷേപകരമായ കാര്യങ്ങൾ സപ്പോർട്ട് ചെയ്യുകയോ ഷെയർ ചെയ്യുകയോ ചെയ്യരുതെന്ന് അഭ്യർഥിക്കുന്നു- അന്ന രാജൻ പറഞ്ഞു.
