പാലാ: കോവിഡ് 19 എന്ന വൈറസ് ലോകത്തെയാകെ ആക്രമിക്കുന്പോൾ രാജ്യമൊട്ടാകെ ഈ മഹാമാരിക്കെതിരെ ജനത ഒറ്റക്കെട്ടായി പോരാടുന്പോൾ പൊതുജന സേവന രംഗത്ത് 24 മണിക്കൂറും കർമനിരതരായ പോലീസ് സേനയ്ക്കു പിന്തുണയുമായി ഒരു പട്ടാളക്കാരൻ പാലായിൽ.
ഊട്ടിയിൽ സൈനിക സേവനം ചെയ്യുന്ന എലിക്കുളം സ്വദേശിയായ പ്രമോദ് കുമാർ എന്ന ഇദ്ദേഹം ലീവിൽ നാട്ടിൽ എത്തിയതാണ്. ഇതിനിടയിലാണ് കോവിഡ് 19 നാട്ടിലാകെ ഭീതി പടർത്തിയത്.
രാജ്യസേവനം ചെയ്യുന്ന പട്ടാളക്കാരനായ ഇദ്ദേഹത്തിനു നോക്കി നിൽക്കുവാൻ സാധിക്കാത്ത അവസ്ഥ. ഒട്ടും മടിക്കാതെ പ്രമോദും സേവന രംഗത്തിറങ്ങി. പൊതുനിരത്തുകളിൽ ജോലി ചെയ്യുന്ന നിയമപാലകർക്കും, പാതയോരങ്ങളിൽ ഒറ്റപ്പെട്ടവർക്കും കുടിവെള്ളവും സ്നാക്സും നൽകി.
എന്നും രാവിലെ നിരത്തുകളിൽ ജോലി ചെയ്യുന്ന പോലീസുകാർക്ക് അവർ ജോലി ചെയ്യുന്നയിടങ്ങളിൽ കുടിവെള്ളവും ബിസ്കറ്റും വൈകുന്നേരങ്ങളിൽ ചായയും ബിസ്കറ്റുമായി പ്രമോദ് എത്തും.
പാലാ നഗരസഭ ഏർപ്പെടുത്തിയിരിക്കുന്ന 20 രൂപ പൊതിച്ചോറും കൈക്കാശുമുടക്കി വാങ്ങി വഴിവക്കിൽ വിശന്നിരിക്കുന്ന പാവങ്ങൾക്കു നൽകാനുള്ള നല്ല മനസും ഈ സൈനികനുണ്ട്.
നിയമപാലകർക്ക് മാത്രമല്ല പാതയോരങ്ങളിൽ ക്ഷീണിച്ചു വരുന്ന ആർക്കും നൽകും. തോക്കേന്തി കാവൽ നിൽക്കുന്നതു മാത്രമല്ല, പരോപകാരവും ഒരു രാജ്യ സേവനമായിട്ടാണ് പ്രമോദ് കണക്കു കൂട്ടുന്നത്.
