കാസർഗോഡ്: നേരത്തേ മയക്കുമരുന്ന് കേസിൽ കസ്റ്റഡിയിലെടുത്ത വാഹനം വിട്ടുകിട്ടുന്നതിനായി ജില്ലാ പൊലിസ് ആസ്ഥാനത്തെത്തിയപ്പോൾ മറ്റൊരു കാറിൽ എംഡിഎംഎ കൈവശംവച്ച യുവാക്കൾ പിടിയിൽ. കണ്ണൂര്‍ കാപ്പാട് കടക്കര ടെമ്പിള്‍ റോഡിലെ കെ.പി ഷാനിസ്(35), കര്‍ണാടക പെനാജെ അര്‍ളപദവിലെ അര്‍ഷാദ്(34) എന്നിവരെയാണ് ജില്ലാ പൊലിസ് മേധാവിയുടെ ഡാന്‍സാഫ് ടീമും പൊലിസും ചേര്‍ന്ന് പിടികൂടിയത്.
പൊലിസിനെ കണ്ടപ്പോൾ അർഷാദ് പെട്ടെന്ന് കാറിനുള്ളിലേക്കിട്ട ബാഗിന്‍റെ കാര്യത്തിലാണ് പൊലിസിന് സംശയം തോന്നിയത്. പരിശോധിച്ചപ്പോൾ 0.240 ഗ്രാം എംഡിഎംഎ ഇതിൽനിന്ന് കണ്ടെടുക്കുകയായിരുന്നു. നേരത്തേ നീലേശ്വരം പൊലിസ് മയക്കുമരുന്ന് കേസില്‍ പിടികൂടിയ വാഹനം വിട്ടുകിട്ടുന്നതിനാണ് രണ്ടുപേരും ജില്ലാ പൊലീസ് ആസ്ഥാനത്തെത്തിയത്.
ഷാനിസ് ജില്ലാ പൊലീസ് ആസ്ഥാനത്തെ നാര്‍ക്കോട്ടിക് സെല്‍ ഡിവൈഎസ്‌പി ഓഫീസിലേക്ക് കയറിച്ചെല്ലുകയും അർഷാദ് പുറത്ത് കാറിനു സമീപം കാത്തുനിൽക്കുകയുമായിരുന്നു. എംഡിഎംഎ കണ്ടെത്തിയതോടെ രണ്ടുപേരുടെയും അറസ്റ്റ് രേഖപ്പെടുത്തി.
