കുറവിലങ്ങാട്: ബസും ബൈക്കും കൂട്ടിയിടിച്ച് പ്ലസ് ടു വിദ്യാർത്ഥി മരിച്ച് മണിക്കൂറിനുള്ളിൽ നിയന്ത്രണം വിട്ട കാർ ഗ്രോട്ടോയിലേക്ക് ഇടിച്ചുകയറി.
കാറിലുണ്ടായിരുന്ന യാത്രക്കാർ പരുക്കേൽക്കാതെ അത്ഭുതകരമായി രക്ഷപ്പെട്ടു. ഐഎസ്ആർഒയിലെ റിട്ട. ഉദ്യോഗസ്ഥൻ തിരുവനന്തപുരം സ്വദേശി റാം സുന്ദർ, ഭാര്യ എന്നിവരാണ് അപകടത്തിൽപ്പെട്ടത്. ഗുരുവായൂരിൽ ക്ഷേത്രദർശനം കഴിഞ്ഞ് മടങ്ങുകയായിരുന്നു ഇവർ.
നന്പ്യാകുളം പിയാത്ത ജംഗ്ഷനിലെ ഗ്രോട്ടോയിലേക്കാണ് കാർ ഇടിച്ചുകയറിയത്. ഇവിടെ മെയ്മാസ വണക്കാചരണവുമായി ബന്ധപ്പെട്ട് സ്ഥാപിച്ചിരുന്ന പന്തൽ തകർത്തു. ഗ്രോട്ടോയ്ക്കും കേടുപാടുകളുണ്ടായെങ്കിലും തിരുസ്വരൂപത്തിന് തകർച്ചയുണ്ടായിട്ടില്ല.
