മലപ്പുറം: കേരള ടൂറിസം ഡെവലപ്‌മെന്‍റ് കോര്‍പറേഷന്‍റെ ‘ഇന്‍ കാര്‍ ഡൈനിംഗ്’ പദ്ധതി കുറ്റിപ്പുറം കെടിഡിസി ആഹാര്‍ റസ്റ്റോറന്റിലും തുടക്കമായി. പദ്ധതിയുടെ ഉദ്ഘാടനം കെ.ടി ജലീല്‍ എംഎല്‍എ നിര്‍വഹിച്ചു.
കോവിഡ് കാലം എല്ലാ മേഖലകളിലും ബദല്‍ സംവിധാനങ്ങള്‍ക്ക് കളമൊരുക്കിയിരിക്കുകയാണ്. ടൂറിസം വകുപ്പിനു കീഴിലെ റെസ്റ്റോറന്‍റുകളില്‍ കോവിഡ് പശ്ചാത്തലത്തില്‍ പാഴ്‌സല്‍ സര്‍വീസ് മാത്രം അനുവദിക്കുന്നതിനാല്‍ വാഹനങ്ങളില്‍ യാത്ര ചെയ്യുന്നവര്‍ക്കു ഹോട്ടലുകളില്‍ കയറി ഭക്ഷണം കഴിക്കാന്‍ സാധിക്കാത്ത സ്ഥിതിയാണ്.
ഇതിനൊരു ബദല്‍ എന്നുള്ള നിലയിലാണ് ഇന്‍ കാര്‍ ഡൈനിംഗ്് പദ്ധതി നടപ്പാക്കിയിരിക്കുന്നതെന്നു പദ്ധതിയുടെ ഉദ്ഘാടനം നിര്‍വഹിച്ച് എംഎല്‍എ പറഞ്ഞു.
വാഹനങ്ങളില്‍ നിന്നു പുറത്തിറങ്ങുകയോ ഹോട്ടലുകളില്‍ കയറുകയോ ചെയ്യാതെ ഭക്ഷണം കഴിക്കാമെന്നുള്ളതാണ് ‘ഇന്‍ കാര്‍ ഡൈനിംഗ്’ സംവിധാനത്തിന്റെ പ്രത്യേകത.
പാര്‍ക്കിംഗ് സൗകര്യമുള്ള ഹോട്ടലുകളിലാണ് ഈ പദ്ധതി നടപ്പാക്കുന്നത്. കോവിഡ് കാലത്ത് ജനങ്ങള്‍ക്ക് മികച്ച ഭക്ഷണം സുരക്ഷിതമായി നല്‍കുക എന്ന ലക്ഷ്യത്തോടെയാണ് കെടിഡിസി ഹോട്ടലുകളെ ഉപയോഗിച്ച് ഈ പദ്ധതി നടപ്പാക്കുന്നത്.
പദ്ധതി വിജയകരമാണെങ്കില്‍ കൂടുതല്‍ സ്ഥലങ്ങളില്‍ ഇന്‍ കാര്‍ ഡൈനിംഗ് തുടങ്ങും. ഉദ്യോഗസ്ഥരായ അലക്‌സ് പി. ജോഷോ, രമേശ്, സന്തോഷ്, സജീവന്‍ തുടങ്ങിയവര്‍ പങ്കെടുത്തു.
