അക്ര (ഘാന): ഫിഫ 2026 ലോകകപ്പ് ഫുട്ബോളിലേക്കുള്ള ദിനങ്ങള് കൊഴിയുന്നതിനിടെ, ദേശീയ ടീം കോച്ച് ഓട്ടോ അഡോയെ ഘാന ഫുട്ബോള് അസോസിയേഷന് പുറത്താക്കി. ഔദ്യോഗിക വെബ്സൈറ്റിലൂടെ ഇന്നലെയാണ് ഇക്കാര്യം ഘാന ഫുട്ബോള് അസോസിയേഷന് അറിയിച്ചത്.
ജര്മനിക്ക് എതിരായ സൗഹൃദ മത്സരത്തില് 2-1നു പരാജയപ്പെട്ടതിനു പിന്നാലെ ഓട്ടോ അഡോയെ പുറത്താക്കുകയായിരുന്നു. ലോകകപ്പിനു മുന്നോടിയായി കളിച്ച നാല് സൗഹൃദ മത്സരങ്ങളിലും ഘാന പരാജയപ്പെട്ടതോടെയാണ് അഡോയുടെ സ്ഥാനം തെറിച്ചത്.
ജപ്പാനോടും (2-0) ദക്ഷിണകൊറിയയോടും (1-0) ഓസ്ട്രിയയോടും (5-1) ഘാന പരാജയപ്പെട്ടിരുന്നു. ഓട്ടോയുടെ ശിക്ഷണത്തില് ഘാന രണ്ട് 34 മത്സരങ്ങള് കളിച്ചു. 12 ജയം, എട്ട് സമനില, 14 തോല്വി എന്നതാണ് മത്സര ഫലം.
2022ല് ഘാന കോച്ചായ ഓട്ടോ അഡോ, 2024 മുതലാണ് നിലവിലെ ടേം ആരംഭിച്ചത്. ലോകകപ്പില് ഗ്രൂപ്പ് എല്ലില് ഇംഗ്ലണ്ട്, ക്രൊയേഷ്യ, പാനമ ടീമുകള്ക്കൊപ്പമാണ് ഘാന. പാനമയ്ക്ക് എതിരേ ജൂണ് 18നാണ് ലോകകപ്പില് ഘാനയുടെ ആദ്യ മത്സരം.
