കോട്ടയം: മാറ്റിവെച്ച നറുക്കെടുപ്പുകൾ റദ്ദ് ചെയ്ത് ടിക്കറ്റുകൾ മുഴുവൻ തിരിച്ചെടുത്ത് പകരം പുതിയ ടിക്കറ്റ് നൽകണമെന്ന് ഓൾ കേരള ലോട്ടറി ഏജന്‍റ്സ് ആൻഡ് സെല്ലേഴ്സ് കോണ്ഗ്രസ് (ഐഎൻടിയുസി) സംസ്ഥാന പ്രസിഡന്‍റ് ഫിലിപ്പ് ജോസഫ്.
ജില്ലാ ലോട്ടറി ഓഫീസിനു മുൻപിൽ നടന്ന പട്ടിണി സമരം ഉദ്ഘാടനം ചെയ്യുകയായിരുന്നു അദ്ദേഹം. പുതുതായി അച്ചടിക്കുന്ന ടിക്കറ്റിന്‍റെ മുഖവില 30 രൂപയാക്കുക, എല്ലാ ലോട്ടറിത്തൊഴിലാളിക്കും നറുക്കെടുപ്പ് ആരംഭിക്കുന്പോൾ 5,000 രൂപ സാന്പത്തിക സഹായം നൽകുക തുടങ്ങിയ ആവശ്യങ്ങൾ ഉന്നയിച്ചായിരുന്നു പട്ടിണി സമരം.
ജില്ലാ പ്രസിഡന്‍റ് കെ.ആർ. സജീവൻ അധ്യക്ഷത വഹിച്ചു. അയ്മനം രവീന്ദ്രൻ, ബെന്നി ജോസഫ്, ചന്ദ്രിക ഉണ്ണികൃഷ്ണൻ, മുഹമ്മദ് ബഷീർ, എം തോമസ്, കെ വി ശശി, ഡേവിഡ് കുറ്റിയിൽ എന്നിവർ പങ്കെടുത്തു.
